Read chopi Masalmo 37 Bible Online

Masalmo 37 - chopi bible

Masalmo 37

¹Disalmo da Dhavhidha U nga henye ngu mhaka ya vale va mahako kubiha, kambe u nga bavele avale va mahako ta walo,

²nguko va na wilwa kufana ni diphunde va na wuna kufana ni mwasi wo nakana.

³Themba MKOMA, u txi maha ta tinene; u na aka ha mafuni, u txi hanya ngu kuthembeka.

⁴Veka ka MKOMA minavelo yako ene a na kuninga kuxuva ka mbilu yako.

⁵Ningela nzila yako ka MKOMA; themba kwakwe, se ene a na maha totshe.

⁶Ene a na wonekelisa kululama kwako ni fanelo yako kufana ni ditambo di woningako ni mitshikari.

⁷Themba MKOMA, u txi rinzela ene; u nga khatale ngu vale va humelelako wutomini kwawe, avale va humelelako ngu makungo awe o biha.

⁸Leka kuhenya, u nga zumbe ni dikhulo; u nga henye, nguko eto ti va nga kubiha dwe.

⁹Sigevenga si na loviswa, aniko avale va thembako MKOMA va na mana thomba ya mafu.

¹⁰Ngu mbimoanyana ya yidotho, khu na mbi va wona kambe vabihi; hambi u txi tsimbila u va lava, khu na mbiswa u va wona.

¹¹ Aniko avale vo thutha va na mana mafu va na tsaka, ve hanya ngu kudikha.

¹²M'thu wo biha a maha sikungo sa kuwukela awu i ku wam'nene a gegeresela makwasa akwe ngu kuhenyela ene.

¹³Aniko MKOMA wa m'seka, nguko wa tiziva ti to masiku akwe ma komile.

¹⁴Vobiha va swomola ditxhari dawe, ve domba wulaho, kasi kudaya txisiwana ni txikulungu, kasi kudaya avale va londetako nzila ya yinene.

¹⁵Kambe ditxhari dawe di na va thola mbilu yawe vapune se wulaho wawe wu na komolelwa.

¹⁶Si na ni lisima ngutu sa sidotho asi m'thu wo lulama a ku naso kupinda tithomba tatingi ta vabihi.

¹⁷Nguko MKOMA wa funyeletela mawoko a vabihi, e tsanisa ava va mahako ta tinene.

¹⁸MKOMA wa xayisa vathu vo lulama; liveleko lawe kha li na mbi guma.

¹⁹Kha va na mbi va ni tingana ka masiku a sikarato, ka masiku a nzala, vona va na khura.

²⁰Aniko vaonhi va na fuva; valala va MKOMA va na hya kufana ni mwasi wa kuoma va na hangalaka kufana ni wutshi.

²¹M'thu wa kubiha wa lomba, kambe kha diheli, aniko m'thu wo lulama ana ni wumbilu ni wuha.

²²Avale MKOMA a nga va katekisa va na mana mafu, aniko avale a nga va singitela va na fuviswa.

²³MKOMA wa komba vathu nzila yakwe wa vhikela avale va mtsakisako.

²⁴Mlulami hambi a txi wa, kha weli mphelo, nguko MKOMA a na mñola ngu diwoko e mu wusa.

²⁵Ni ti mfana, se konkuwa ni kumbile, kambe kha ni zivi kuwona m'thu wo lulama e lekwa wusiwanani, hambi vanana vakwe kha ni zivi ku va wona ve kombela sakudya.

²⁶Yotshe mbimo ene i m'thu wa wumbilu ni wuha; vanana vakwe va katekile.

²⁷Thava wubihi, u txi maha ati i ku ta tinene, se u na hanya kala kupinduka.

²⁸MKOMA a randa kululama ene kha leki vathu va va mthembako. Ene wa va vhikela yotshe mbimo, aniko liveleko la vabihi li na fuviswa.

²⁹Vathu vo lulama va na dya thomba ya mafu, va na xayiseka ka ona yotshe mbimo.

³⁰Txisofu txa m'thu wo lulama txi womba mapswi a wutxhari; lidimi lakwe li womba mapimo amanene.

³¹Ene ana ni mlayo wa Txizimu mbiluni kwakwe, ngu kumaha keto, mikondo yakwe kha yi rithimuki.

³²M'thu wo biha a mbzwingamela m'thu wo lulama a lava makungo a ku m'daya;

³³aniko MKOMA kha na mbi mleka a txi wa manzani ka mlala, kambe kha na mbi mleka a txi konwa kulamulwani.

³⁴Themba MKOMA, u londeta tinzila takwe ene a na kuguleta, e kuninga mafu awa me maha thomba yako; awe u na ti wona ngu maso ako mbimo yi va no fuviswa vabihi.

³⁵Ni woni m'thu wo biha a txi ti kukumukisa ngu mtamo, e nava kufana ni mndonga wa mazokoro o nyuka;

³⁶kambe a mwalate: Khe ngadi a txi hanya; ni mlavile, aniko kha na mmana.

³⁷Wona m'thu wo thaviseka, wonisisa m'thu wo lulama; m'thu wo dikha a na va ni vatukulu.

³⁸Aniko vaonhi votshe va na fuviswa; liveleko la vabihi li na loviswa.

³⁹Kuhanyiswa ka valulami kuta ngu ka MKOMA, ngene wuthavelo wawe ka timbimo ta sikarato.

⁴⁰MKOMA wa va vhuna ni ku va hulukisa; ene wa va vhikela ka vabihi, a txi va hanyisa, nguko vona va themba ene.