Read chopi Masalmo 38 Bible Online

Masalmo 38 - chopi bible

Masalmo 38

¹Disalmo da Dhavhidha. Da kualakanyisa. MKOMA, u nga ni kawuke ngu kuhenya kwako, kambe u nga ni tsayise ngu txiviti txako.

²U ni dayisile ngu tingove tako u txi ni wisa hahatshi.

³Ku walo txihango txa mmidi wangu, txi hanyako; ngu mhaka ya kuhenya kwako, kuwalo kuhanya marambuni kwangu ngu mhaka ya sionho sangu.

⁴Sionho sangu si tshutshutile si ni khubhunyetile ni msungo; sa ni kama kufana ni mrwalo wo nemela ngutu.

⁵Silonda sangu sa nunga, sa humela wubovhu, ngu mhaka ya wuphukuphuku wangu.

⁶Ni dombekile ni tsimbila ni di namile ngutu, ni zumba ni di kupandiseka dotshe ditshiku.

⁷Txiwunu txangu txa hisa ngutu; wotshe mmidi wangu wa panda!

⁸Ni rerekile, ni wite hahatshi ngutu; ni keta ngu mhaka ya kuxaniseka ka mbilu yangu!

⁹MKOMA, awe wa kuziva kotshe kuvilela ka mbilu yangu; ni tingumo tangu kha ti sisaleki kwako!

¹⁰Mbilu yangu ya bhibhikela ngutu, mtamo wu gumile. Maso angu ni ona kha ma woni txilo.

¹¹Vandoni vangu ni vanakulothi va hambukile ngu mhaka ya dikhombo dangu; maxaka angu ma ema ngu kule.

¹²Avale va lavako ku ni daya va ni riyete; avale va ni navelelako kubiha va ni ruketela; sotshe sikhati va maha sikungo so kanganyisa.

¹³Kambe ani ni ti maha diphanzeve, kha ni engisi; ni ti maha txiduma, kha ni tuli txisofu.

¹⁴Ni fana ni wule asi engisiko, awu a kuwalo ni dipswi da kutiangulela.

¹⁵Nguko ani ni themba awe, MKOMA, awe wa ni angula, MKOMA, Txizimu txangu.

¹⁶Ni kukombela txilo tximwetxo, MKOMA: U nga tumele ti to vathu ve tsakiswa ngu dikhombo dangu; u nga va leke ve ti kulisa ngu mhaka ya kuhumbwa kwangu.

¹⁷Konkuwa ni hafuhi ni kuwa; kuxaniseka kha ku ni leki, otshe masiku.

¹⁸Ni na ti tshanza sionho sangu, nguko sa ni vangela kukarateka.

¹⁹Valala vangu va hanya, va na ni mtamo; mbavangi, va ni vengako va si nga ni fanelo.

²⁰Vona va ni dihela wunene ngu wubihi, ve ni wukela, kasi ani ni khutala ngu kumaha wunene.

²¹MKOMA, u nga ni leke! Txizimu txangu, u nga ve kule ni nani!

²²Ngono ngu kukuluveta u ta ni vhuna, MKOMA, Muhanyisi wangu!