Read chopi Masalmo 4 Bible Online

Masalmo 4 - chopi bible

Masalmo 4

¹Disalmo da Dhavhidha. Ka mthangeli wa vaembeleli, ni sitende sa tingoti. Awe Txizimu, mlweli wa tifanelo tangu, ni xamule ni txi kudhana! Awe ngawe u nga ni hulukisa ka sikarato, telwa ngu wumbilu ngu ngani, u txi engisa mkombelo wangu.

²Anu vanana va vathu, mi na poyilela wudhumo wangu kala yihi mbimo kani? Mi na leka ditshiku muni kukanganyisa, ni kuranda makuhu kani?

³Ti ziveni taku MKOMA wa maha sidiwukiso ka wule a mrandako, MKOMA wa ni engisa, ngako ni txi kwangula masoni kwakwe.

⁴ Dhudhumelani kambe mi nga goheni. Wombawombani ngu mbilu mi di malate mi txi otela matahoni kwanu.

⁵Ningelani timhamba ta kululama mi txi veka kuthemba kwanu ka Txizimu.

⁶Vavangi va womba va txi kha vona: “I mani a no hi ninga makatekwa kani?” MKOMA hi woninge ngu liwoningo la khohe yako!

⁷U vekile litsako la hombe mbiluni kwangu kupinda la vale va tsakelako kupfuna ngu fulaho ni vhinya.

⁸Ni na rwama ni txi otela ngu kudikha, nguko awe, MKOMA, ngawe dwe u ni ningako kuhanya ngu kuxayiseka.