Read chopi Masalmo 44 Bible Online

Masalmo 44 - chopi bible

Masalmo 44

¹Txithokozelo txa mtxawa wa Kora Ka mthangeli wa vaembeleli Txizimu, athu hipune hi ti engisile va txi xawuta atile hi nga gelwa ngu vakale vathu sidiwukiso si u nga si maha ka masiku a kuhanya kwawe.

²Awe u tutumisile vathu va timwani tixaka u akisa ditikoni kwawe vathu vako; u tsayisile yimwani mifumo u kulisile vathu vako.

³Kunene hi nga mhaka ya mtamo wa matxhari awe va nga sikota kuhonyola ditiko, hi nga mhaka ya wurena wa mawoko awe va nga za ve di mana; aniko va di mani ngu mtamo wako wa hombe, niko u nga ti hafuhi navo, nguko awe u ti va randa.

⁴Txizimu, awe ngawe mfumeli wangu! Ninga kuxula ka vathu vako!

⁵Hi xula valala vathu ngu mtamo wako, ngu ditina dako ha ganyatela vaxanisi vathu.

⁶Ani kha ni thembi wulaho wangu ni ditxhari dangu ti to si nga ni hanyisa.

⁷Ngawe u nga hi hulukisa ka valala vathu ngawe u nga xula avale va hi vengako.

⁸Hi na kudhumisa, awe Txizimu, yotshe mbimo, hi na ku bonga kala kupinduka.

⁹Kambe konkuwa, u hi lekile, u hi thete tingana; se khuswi u txi pangalata mabutho athu a tiyimbi.

¹⁰U hi lekile hi txi hingwa ngu valala vathu; ava va hi nyenyako va hi honyolete sathu ngu kuranda kwawe.

¹¹U hi ningete kufana ni tinvuta to yela kuya dawa; u hi hangalasile hagari ka vathu va mamwani matiko.

¹²U xavisile vathu vako ngu sa kwa mbi nyawula, kambe khwa engetela mtengo wo xavisa ngu wona thomba.

¹³U hi mahile sisekiso ka vaakelani; hi sekwa ni kupoyilelwa ngu vale va nga hi randela.

¹⁴U hi mahile divingu hagari ka matiko, vathu ve zinginisa misungo ve hi txhipisa.

¹⁵Pfilu-pfilu yiho masoni kwangu yotshe mbimo, se tingana ta khohe yangu ta ni fengeta,

¹⁶dipswi da wule a ni wukelako a txi ni ruketela, ngu mhaka ya mlala ni wule a pharelako.

¹⁷Totshe tiya ti tile txitimwi kwathu; hambi keto kha hi ku divali, hambi kuva hi di manekile hi di txhipisile txitumelelano txako.

¹⁸Timbilu tathu kha ta tshumelela msana, hambi mikondo yathu kha ya huma ka ditshuri dako,

¹⁹Hambiko u nga hi funyeletela ka wukhalo wa dragoni, u hi fengeta ngu mtsudi wa lifo.

²⁰Ngako hi txi divala Txizimu txathu, se hi nawuluta manza athu ka txizimu txa walo,

²¹ina Txizimu kha txi na mbi tiziva tona eto kani? Nguko txona txa ziva txihunja txa mbilu yathu.

²² “Ha dawa ngu mhaka yako dotshe ditshiku. Hi wonwa nga tinvuta to emiselwa kuya kudawani.”

²³Vhumuka! Ngu kutxani u otelako kani MKOMA? Wuka! U nga hi leke kala kupinduka!

²⁴Ngu kutxani u sisa khohe, u divala kuxaniseka kwathu, ni kukhoziswa kwathu kani?

²⁵Nguko dihika dathu di wite hahatshi, ni mimidi yathu yi dombekile kala kugwesa mafu.

²⁶Khukha u txi ta hi vhuna; hi xangute ngu kurando ka wumbilu wako.