Read chopi Masalmo 45 Bible Online

Masalmo 45 - chopi bible

Masalmo 45

¹Ka mthangeli wa vaembeleli - ngu mpfumawulo a “Makhoñwa.” Txithokozelo txa mtxawa wa Kora. Ndando ya lirando. Mbilu yangu yi tate ngu mapswi o tshura ngutu; ni na thula ndando yangu ya ku embeleta mfumeli wa ditiko! Lidimi langu i peniselo ya m'bhali wo txhariha.

²Awe u dijaha do tshura ngutu kupinda otshe majaha! Txisofu txako txi womba mapswi o xamalisa Ngu toneto, Txizimu txi kukatekisile kala kupinduka.

³Awe ndena, khweketa ditxhari dako txiwununi; dona da kuhanela ni ku kupfalisa!

⁴Kupfalisekani kwako, gadha dihantxhi dako u ya lwela ditshuri, u txi lwela txisiwana ni wo lulama mtamo wako wupune wu na kukomba sidiwukiso si u fanelako ku si maha.

⁵Tingove tako ti lotilwe ta tinene; mabutho a tiyimbi ma khoziswa mikondoni kwako; valala vako va thelwa dikhodho masoni kwako.

⁶ Txikhalo txako txa wukoma txi fanana ni txikhalo txa Txizimu txi txi hanyako kala kupinduka, wukoma wako wu na va mfumo wa kululama.

⁷Awe u fanete kuranda kululama, u txi nyenya wubihi; ngu mhaka yeto, Txizimu, Txizimu txako, txi ku sawulete toneto hagari ka majaha kuloni txi kusawulekisa ngu mafura kasi ku kumaha mfumeli.

⁸Syambalo sako sa bhumula mira, alowesi ni kasiya. Va kutsakisa ngu tindando to tshambiselwa ngu txitende! Tinyumbani ko tshuriselwa ngu makwasa a tinzofu!

⁹Vanana va txisikati vavafumeli, va ti ti ho hagari ka mahorana; ngu didhawa dako da txinene ku ti ti ni mfumeli wa txisikati, a nga ambala syambalo so tshuriselwa ngu nzalama ya lisima ya Ofiri.

¹⁰Engisa, mwanangu, engisisa ti ni kugelako; divala va ka kwanu, ni mwaya wa tate wako,

¹¹nguko mfumeli a bzwetilwe ngu kutshura kwako; ene ngene mkoma wako: Mu vekele txithavo!

¹²Se mwanana wa muhorana wa Tiro, a na va koneyo ni ni siningo; vanyatithombe va ku hagari ka vathu, va na kombela wunene wako.

¹³Mwanana wa muhorana wa mfumeli, ngene i ku wo woneka nyumbani kwako ka wukoma! Syambalo sakwe nza nzalama yo lukelwa!

¹⁴A di bombisilwe ngu so tshura ngutu, wa heleketwa ka mfumeli; a londiselwa ngu mahorana kulowe a tipheleketi.

¹⁵Va tsimbila va di tsakile ngutu ve wulela nyumbani ka wukoma va txi nengela.

¹⁶Awe mfumeli, vanana vako ngu vona va no kutsiveta ha txikhaloni ka wukoma atxi va nga ti khalahatshile ka txona vakale vako; u na va veka ve maha tinduna tako ka matiko otshe.

¹⁷Ni na maha ti to ditina dako di alakanywa ka liveleko ni liveleko; ngu kumaha keto, vathu va na kudhumisa ngu ha ku si gwitiko.