Read chopi Masalmo 49 Bible Online

Masalmo 49 - chopi bible

Masalmo 49

¹Disalmo da wu mtxawa wa ka Kora. Ka mthangeli wa vaembeleli Engisani mhaka yiya, anu vathu va ha mafuni; yi engiseni anu mi nga aka ha ditikoni,

²vanyatithombe mwendo sisiwana, anu va mtamo mwendo sikulungu.

³Ni lava kuwomba mapswi a wuzivi, ni txi mi gela mapimo angu a kutshima ngutu.

⁴Ni na engisisa tigondo ta wuzivi ni na txhamusela wuzivi wuwa ngu kuveta ka txitende.

⁵Ni na thavela txani masiku a kubiha, mbimo yi valala vangu va no ni randela kani?

⁶Vona va themba tithomba tawe, va ti kukumukisa ngu suma si va ku naso.

⁷Ku walo ni wammweyo wawe a sikotako kutirula mwanawe, mwendo kuningela txo ti tirula ngu txona ka Txizimu.

⁸Kutirula m'thu ka dhula ngutu; hambi yotshe male yidotho;

⁹nga yi si eneli kutirula wutomi wa m'thu, kasiku e hanya kala kupinduka.

¹⁰Nguko wa ti wona taku titxhari ta fa, kufana ni mabhemba ni sipumbu, va txi siya suma sawe ka vamwani.

¹¹Mapimo a mndani kwawe, ngu tito, tinyumba tawe nda yotshe mbimo, ka liveleko ni liveleko; matiko awe va ma raya matina awe vapune.

¹²Wuhombe wa m'thu kha wu sikoti ku m'hulukisa ka lifo; kufana ni sotshe sihari, nene a fanete kufa.

¹³Ayiya ngu yona nzila ya vale va ti thembako ngutu vapune; magwito a vale va ti dhumisako ngu mapswi awe.

¹⁴Va siketwe kufa kufana ni tinvuta, se lifo li na maha m'dyisi wawe; va na mitwa ngu lifo kufana ni sihari; mtamo wawe wu na mitwa wu txi txakutelwa ngu dithuna.

¹⁵Kambe Txizimu txi na tirula wutomi wangu, txi na wu hulukisa mtamoni ka lifo.

¹⁶U nga khatale ngu wule a sengeletelako tithomba, hambi wu a engetelako nduma ya m'ti wakwe.

¹⁷Mbimo yi a no fa, kuwalo txi a no tsula natxo; thomba yakwe kha yi na mbi mpangalata.

¹⁸Hambi a sa nga va ni kupwata txilo kuhanyani kwakwe ha mafuni. Hambi vathu va txi kudhumisa ngu mhaka ya tithomba tako,

¹⁹a na ya ka liveleko la vatate vakwe; kha va na mbiswa ve wona ditambo.

²⁰Wuhombe wa m'thu kha wu sikoti ku m'hulukisa ka lifo; kufana ni sotshe sihari, nene a fanete kufa.