Read chopi Masalmo 5 Bible Online

Masalmo 5 - chopi bible

Masalmo 5

¹Disalmo da Dhavhidha. Ka mthangeli wa vaembeleli - va misengele. MKOMA, riya nzeve u txi engisa mapswi angu, engisa kuketa kwangu.

²Engisa huwa yangu, awe MKOMA wangu ni Txizimu txangu, nguko ani ni tisa kwako mkombelo wangu.

³Ni mixo, MKOMA, engisa dipswi dangu, neti di txi txa ditambo ni veka masoni kwako txikombelo txangu ni txi rinzela xamulo yako.

⁴Awe khu nga Txizimu txo tsakela to biha; avale va mahako kubiha kha va si koti kuzumba hafuhi ni nawe.

⁵Avale va ti kulisako kha va na wukhalo hafuhi kwako nguko awe wa nyenya votshe vale va mahako kubiha

⁶wa fuvisa ava i ku vamakuhu. Wa nyenya sigevenga ni vakanganyisi.

⁷Aniko, ani, ngu wuhombe wa lirando lako, na sikota kuwulela nyumbani kwako ni txi kukhozela amu Dithepeleni kwako ngu txithavo.

⁸Ni tsimbitise, MKOMA, ngu nzila yako yo lulama u txi ni vhikela ka valala vangu. Lulamisa masoni kwangu nzila yako.

⁹ Sisofuni kwawe kha ku na ditshuri; timbilu tawe ti tate ngu wubihi. Mkolo wawe diyiva do asama, lidimi lawe li yisa kufani.

¹⁰Awe Txizimu va rweke mnandu wawe! Va leke va txi loviswa ngu makungo awe. Va tutumise ngu mhaka ya mtalo wa sionho sawe, nguko va terekile va txi kuwukela.

¹¹Kambe va na tsake votshe avale va thavelako kwako, va na giye yotshe mbimo, nguko awe wa va vhikela, kambe va tsaka ngu ngawe. Avale va randako ditina dako, va ku tsakelako.

¹²Nguko awe u katekisa wule a mahako to lulama, wunene wako wa m'vhikela kufana ni txitxhavangu.