Read chopi Masalmo 52 Bible Online

Masalmo 52 - chopi bible

Masalmo 52

¹Txithokozelo txa Dhavhidha. Ka mthangeli wa vaembeleli. Txi nga bhalwa ngu Dhavhidha, msana ka kuva Dhowege, muedhomi, a di manani ni Sawule, e m'gela ku khene, Dhavhidha a wulete nyumbani ka Abhimeleki Ngu kutxani u txi ti guleta mu kubihani kwako, kani? Lirando la Txizimu kha li gumi!

²U pimisa kumaha to biha dwe ka vamwani; lidimi lako li fana ni txigatxani txo hinda, li sika makuhu.

³U dhunda wubihi kupinda wunene, u dhunda makuhu kupinda ditshuri.

⁴U dhunda kuhaxula ngu mapswi, totshe ti u wombako i makuhu.

⁵Ni txona Txizimu txi na kulovisa kala kupinduka. Txona txi na kuñola txi ku huka ha m'tini kwako; txona txi na kuthavisa mu ditikoni ka vohanya.

⁶Ngako vathu vo lulama va txi ti wona toneto, va na thava, kambe eneyo m'thu va na mseka, va txi kha vona:

⁷“Ndiyo m'thu a nga mbi kombela kuvhikelwa ngu Txizimu; a ti themba tithomba takwe ni mithumo yakwe yo biha.”

⁸Kambe ani, ni fana ni mkhure wo nyuka amu m'tini ka Txizimu; ni themba wumbilu wa Txizimu yotshe mbimo.

⁹Yotshe mbimo ni na kudhumisa ngu mhaka ya ti u nga maha kala kupinduka. Masoni ka vasawuleki vako ni na dhumisa ditina dako, nguko awe u wamnene.