Read chopi Masalmo 55 Bible Online

Masalmo 55 - chopi bible

Masalmo 55

¹Txithokozelo txa Dhavhidha. Ka mthangeli wa vaembeleli - ngu wuembeleli wa txiya txa tingoti. Engisa, Txizimu, mkombelo wangu; riya nzeve u txi engisa kudila kwangu!

²Ni engise, u txi ni xamula; nguko kuxaniseka kwangu kha ku ni ningi kudikha, na keta.

³Ngu kuengisa diguwa da valala, ni kuxaniswa ngu vaonhi. Vona va ni vangela dikhombo kambe vona va ni xanisa ngu txiviti.

⁴Mbilu yangu ya bhibhikela khanani kwangu; dizowa da lifo di wite txitimwi kwangu.

⁵Dizowa ni kudhudhumela si ni kamile ngutu; ni fenengetilwe ngu txidema.

⁶Se ani ni ti khani: I ti ku no mana mabhapi nga txituvani, ni ndi na puruma ni ya zumba kule ni humula!

⁷Ni ndi na thava ni txi ya kule ngutu, ni txi ya hanyela txiwulani.

⁸Nga ni txi lava wuthavelo ngu kukuluveta kasi kuhuluka ka diphuho da mtamo ni da txihuhuri.

⁹Va hangalase, MKOMA, u hambanisa tidimi tawe, nguko ni wona tshofu ni vhilinganya didhoropani.

¹⁰Wusiku ni mitshikari va horolokela maguma a didhoropa, kambe mndani ka dona ku tate ngu wugevenga ni kuvengelana.

¹¹Mndani ka didhoropa kumaneka wubihi; magondoni ka dona kha ku gwiti kuxanisana ni kuxengetelana.

¹²Idiku awule a nga ni onhela i mlala, ani ni ndi na timisela ngu ngene; idiku awule a nga ni wukela ngu wule a ni vengelako, nga ni txi sikota kusisala.

¹³Aniko ngawe, m'thu wo fana ni nani, mngana wangu wo thembeka,

¹⁴awule ni sengelako nayo amu ka milayo yo tsakisa, awule ni nga ti longoloka nayo ngu kutsaka ni ya Dithepeleni ka Txizimu!

¹⁵Lifo li na kanganyise valala vangu! Va na relele va txi hanya ditikoni ka vafi, nguko wubihi wu akile timbiluni kwawe.

¹⁶Ngu didhawa dangu, na kombela ka Txizimu; MKOMA a na ni hanyisa.

¹⁷Ni minova, ni mixo, ni dhina ni na khongela; ni na kwangula, se ene a na engisa dipswi dangu.

¹⁸Ene a hulukisile ngu kudikha moya wangu ka vale va nga txi ni lwisa, nguko i ti vavangi avale va nga ti ni lwisa.

¹⁹Txizimu, txi txi fumako kala kupinduka, txi na ni engisa, txi txi va veka hahatshi. Nguko vona kha va hunduluki kambe kha va thavi Txizimu.

²⁰Va guleta manza awe ve wukela vale va nga ti ni kudikha navo; ve bhenula txitumelelano txawe.

²¹Va womba-womba mapswi o swililika kupinda bhotela, aniko mipimiso yawe nja yimbi; va womba-womba mapswi o tshamba kupinda mtona, kasi ona matxhari o lotwa.

²²“Veka wutomi wako manzani ka MKOMA se ene a na kuxayisa, txima kha na mbi leka m'thu wo lulama e xaniseka yotshe mbimo.”

²³Awe, Txizimu, u na va rethela diphalani ka kuhokoma. Vathu va i ku sigevenga ni va va makuhu kha va na mbi hanya hafu ya masiku awe. Aniko ani, ni themba awe.