Read chopi Masalmo 56 Bible Online

Masalmo 56 - chopi bible

Masalmo 56

¹Ndando ya Dhavhidha. Ka mthangeli wa vaembeleli - ngu wuembeleli aku “Txituvani txo Malala txi di Kule.” Yo bhalwa ngu Dhavhidha, mbimo yi a nga ñolwa ngu Vafilista, didhoropani ka Gate. Telwa ngu wumbilu ngu ngani, awe Txizimu, nguko waho m'thu a lavako ku ni kandetela, a txi ni xanisa ni ku ni lwisa dotshe ditshiku.

²Valala vangu va ni xanisa yotshe mbimo; mbavangi, awe Nyatxitimwi, avale va lwako ni nani.

³Ka ditshiku di ni no thava, ani ni na themba kwako.

⁴Ni themba Txizimu, se ni dhumisa mapswi a txona; ni themba Txizimu, se kha ni na mbi thava txilo. M'thu a nga ni mahela kubiha ka txani kani?

⁵Vona va txitxa mapswi angu yotshe mbimo; mipimiso yawe njo ni mahela to biha.

⁶Va ramba sikungo, va txi ni baramela, va txi wonisisa makando angu, na va txi rinzela mbimo ya ku ni daya. Ina vathu vo bihisa tiya va nga huluka kani?

⁷Awe Txizimu, hi hulukise ka wubihi wawe; kuhenyani kwako va wise hahatshi evo vathu.

⁸Awe wa tiziva ti ni nga xanisekisa tona, u sengeletile mirongo yangu amu ka txiya, ina totsheto khwa bhala dibhukuni kwako, kani?

⁹Ka ditshiku di ni no kukombela txivhuno, se valala vangu va txi tshumelela msana, ni na va ni tiziva ti to Txizimu txi ni nani.

¹⁰Ni themba Txizimu, se ni dhumisa mapswi a txona; inna, ani ni themba MKOMA, ni txi dhumisa mapswi akwe;

¹¹ni themba Txizimu, se kha ni na mbi va ni dizowa. M'thu a nga ni mahela kubiha ka txani kani?

¹²Sithembiso si ni nga ku mahela, awe Txizimu, ni lava ku si tatisa ngu kubonga,

¹³nguko u hanyisile moya wangu ka lifo u hulukisile mikondo yangu ka tiphango, ti to ni txi hanya masoni kwako, Txizimu, liwoningoni ka va va hanyako.