Read chopi Masalmo 59 Bible Online

Masalmo 59 - chopi bible

Masalmo 59

¹Ndando ya Dhavhidha. Ka mthangeli vaembeleli - ngu wuembeleli wa “U nga Khundumuse.” Yo bhalwa ngu Dhavhidha mbimo yile Sawule a nga ruma tixoli nyumbani ka Dhavhidha kasi kuya m'daya Txizimu txangu, ni hulukise ka valala vangu; ni vhikele ka vale va ni wukelako.

²Ni hulukise ka vo biha u txi ni hanyisa ka vathu va sigevenga,

³nguko a va va ni riyelako, va wukela muhefemulo wangu, vathu va mtamo va maha sikungo so ni wukela, ni sa hambunyeta txilo hambi kuve ni mnandu, awe MKOMA.

⁴Vona va tutumela ku ni xomela, ni si nga ni mnandu. Wuka, MKOMA u txi wona u ta ni vhuna!

⁵Awe koko MKOMA, Txizimu txa Mabutho a Tiyimbi, Txizimu txa Israyeli, wuka u tsayisa otshe matiko: U ngave ni wumbilu ka ni wihi wa votshe vale va mahako kubiha.

⁶Va wuya ni minova; va txi dilisa ku nga timbwa, na va txi horolokela didhoropani.

⁷Sisofu sawe sa maha likwaha; mapswi awe ma fana ni matxhari o hinda; nguko va kha vona: “I mani a hi engisako kani?”

⁸Aniko awe, MKOMA, u na vaseka; u na va tseketsela votshe vamatiko.

⁹Ni na va ni txi vhikelwa ngu ngawe, Txizimu txangu, nguko awe u m'vhikeli wangu wa hombe.

¹⁰Txizimu, txi txi ni randako, txi nata kwangu, txi txi ni ninga kuwona kuxulwa ka valala vangu.

¹¹MKOMA, u nga va daye, kasiku vathu vangu va si divali; va hangalase u txi va xowokisa ngu mtamo wako. MKOMA, awe u m'vhikeli wathu!

¹²Ngu txionho txa txisofu txawe, ni dipswi da txisofu txawe, va sungwa ngu kutikulisa; kumweko ni wubihi ni makuhu va ma humisako.

¹³Va daye, va fuvise kuhenyani kwako, kasi ku va si swi ve hanya! Va na ti zive tito, Txizimu txa fuma ka va ka Israyeli, ni ti to txona txa fuma, ka dotshe ditiko!

¹⁴Va tshumela ve wuya ni minova na va txi dilisa ku nga timbwa, ni kuhorolokela didhoropani.

¹⁵Va peperukela va txi lava sakudya ngako va si khuri, va tenderukela wotshe wusiku.

¹⁶Aniko, ani ni na embelela mtamo wako; ni mixo, ni na dhumisa ngu litsako wumbilu wako, ngu ku uve wuthavelo wangu wo guleka ngutu, ni m'vhikeli wa da ditshiku da kuxaniseka kwangu.

¹⁷Kwako, Txizimu txangu, ni na embelela tindando ta ku kudhumisa, nguko awe u mkhokhola wangu wa hombe, awe u Txizimu txi txi ni randako!