Read chopi Masalmo 60 Bible Online

Masalmo 60 - chopi bible

Masalmo 60

¹Ndando ya Dhavhidha, yo gondisa. Ka mthangeli wa vaembeleli - Ni wuembeleli wa “Dikhoñwa da Wufakazi.” Yo bhalwa ngu Dhavhidha, mbimo yile a nga lwa ni Vasiriya va Mesopotamiya ni va Zobha, niku mbimo yile a nga wuya Jowabhi, a date 12.000 wa va ka Edhomi, mkovani ka Mnyu Txizimu, u hi tshuralete, u hi lekile hi hangalaka; hambiko u nga henya, tshumela u hi wusa.

²U dekadekisile mafu u txi ma bhandisela; tsivetela tufa ta ona, nguko ma khungumuka!

³U mahile ti to vathu ve wona sikarato so thisa ngutu; u hi setile vhinya yo levisa ngutu.

⁴Se konkuwa ninga txikombiso ka vathu vako vo thembeka, kasiku ve sikota kuthava tingove.

⁵Ni ti to ve poniswa avale u va randako. Hi xamule, u txi hi hanyisa ngu diwoko dako da txinene!

⁶Txizimu txi wombile txiluveloni ka txona txi txi kha txona: “Ni na tsaka ni txi abanisa Sikemi ni na pima mkova wa Sukote!

⁷Gileyadhi ni Manasi va ni lumba; Efrayime mtamo wa msungo se Judha i ndonga yangu ya wukoma.

⁸Mowabhi mkamba wu ni sambelako ka wona; txitimwi ka Edhomi ni na rinza disandazi dangu, kurinza disandazi ka wukhalo wokari njikombiso txaku mbukhalo wa nyane wa disandazi donedo. Ni na giya ngu kuxula Vafilista.”

⁹I mani a no ni heleketa mkhokholani ka didhoropa kani? I mani a no ni heleketa kala Edhomi kani?

¹⁰Ina hi nga awe, Txizimu, u nga ti hi lekile, kani? U to hi rethetela kule, u si swi u pangalata mabutho athu a tiyimbi, kani?

¹¹Hi vhune u txi hi lamulela ka valala vathu, nguko txivhuno txa vathu kha txi nyawuli.

¹²Ngu kuvhunwa ngu Txizimu hi na mana kuxula; nguko ngu txona txi no ganyatela valala vathu.