Read chopi Masalmo 65 Bible Online

Masalmo 65 - chopi bible

Masalmo 65

¹Disalmo da Dhavhidha. Ndando. Ka mthangeli wa vaembeleli. Awe Txizimu, u ni fanelo ya kudhumiswa kona Siyoni ni ti to vathu ve tatisa sixambanyo si va nga ku mahela.

²Awe wa engisa mikombelo yathu se votshe va ta kwako,

³sa simama sionho kwangu; aniko awe wa divalela sihambunyeto sathu.

⁴A katekile wule awe u msawulako u txi m'dhana kasiku e hanyela Dithepeleni kwako, hafuhi ni nawe. Hi na khura ngu silo sa nyumbani kwako, amu Dithepeleni kwako ko sawuleka!

⁵Awe wa hi xamula, Txizimu, muhanyisi wathu, ngu mithumo yo xamalisa ya kululama; otshe mafu ma themba awe ni kotshe kuanama ka linene.

⁶Awe wa tsanisa mimango ngu wukoma wako ni mtamo wako.

⁷Awe wa malata kubhonga ka mati a linene, ku gobhoza ka mavimbi ni diguwa da vathu.

⁸Hambi ni vale va nga aka ka matiko a kule va dhudhumela masoni ka sidiwukiso sako; simaho sako si tisa mikulungwani ya litsako kukhukhela makhatoni kala magwito ka ditiko.

⁹Awe wa xayisa ditiko, u txi di rumela txyandela u txi di ninga kunona ni kupfuna. Wa tata minambo yi txi khulunga se u txi nonisa tithembwe ta fulaho, nguko mafu u ma mahete toneto.

¹⁰Wa theletela mati mu ka misele, u txi pima wungi wa ona; wa nakanisa mafu ngu mati amangi a kuwa u katekisa timbewu ta kona.

¹¹Wa katekisa dilembe ngu kunonisa tithembwe! Kotshe mu u tsimbilako ngu kona kuho kupfuna.

¹²Lihawu la txiwulani la nakana se situnga si tala ngu tithomba.

¹³Tibala ti tate ngu mitxhambi ya sifuyo; mikova yi tate ngu fulaho; ngu mhaka yeto, va tsaka ngutu ve kulungela!