Read chopi Masalmo 69 Bible Online

Masalmo 69 - chopi bible

Masalmo 69

¹Ngu ka Dhavhidha. Ka mthangeli wa vaembeleli-ngu mpfumawulo wa “Makhoñwa”. Ni hanyise, Txizimu, nguko ni hafuhi ni kubhwabhwamela.

²Na hojomela diphalani ko hokoma ka ndope, kha ni nga ni ko kanda kona. Ni maneka ni di mu ka mati o mita ngutu ni mpswinga se wa ni ndinda.

³Na foma dipswi ngu kupeka huwa, mkolo wangu omile, wa panda; maso angu ma karala ngu kurinzela, Txizimu txangu!

⁴ Mbavangi vale va ni bavelako na va si nga ni ditshuri kupinda misisi ya ha msungo kwangu; mbavangi ngutu valala vangu avale va hembako ngutu ngu ngani. Se ni na tshumeta asile ni nga mbi pa kani?

⁵Awe, Txizimu, wa wu ziva ta tinene wupumbu wangu; kha ni sikoti ku kusisela siphazamo sangu.

⁶Va nga ve ni tingana ngu mhaka yangu avale va kuthembako, awe MKOMA, MKOMA wa Mabutho a Tiyimbi; avale va ku lavako va nga thuke ve kanganyiswa ngu mhaka yangu, awe Txizimu txa ka Israyeli.

⁷Ngu mhaka ya lirando ni nawe ni zumba ngu kuruketelwa; khohe yangu ya thelwa tingana.

⁸Hagari ka vanathu no nga no va mthuyo; kha ni ziwi ngu vanana va mame wangu.

⁹ Kukhatalela nyumba yako ka ni dya; siruko sa vale va ku ruketelako si wete txitimwi kwangu.

¹⁰Nguko hambi ni txi dila ni kutitona sakudya vona va ni xowokisela;

¹¹hambi ni txi ambala mkhwasi vona va ni tseketsela.

¹²Va womba-womba ngu ngani mu tinzilani ka didhoropa ni madevi ma embelela tindando ngu ngani.

¹³Aniko, ani, MKOMA, ni ta kwako ngu mkombelo; Txizimu, ni xamule, ngako u txi ti wona i di ta tinene, ni xamule, ngu lirando lako la hombe! Awe u ku m'vhuneteli wo thembeka,

¹⁴ni thavise ndopeni, kasiku ni si hojomeli! Ni hanyise ka va va ni vengako ni ka mati o mita!

¹⁵U nga ni leke ni txi ndindwa ngu mpswinga; u nga ni leke ni mitwa ngu diphala do hokoma u nga tumele ti to txisofu txa txisima txi vhaleka txitimwi kwangu!

¹⁶Ni xamule, awe MKOMA, nguko lirando lako mbunene; ni wone, ngu wumbilu wako wa hombe.

¹⁷U nga ni sisele khohe yako ani txithumi txako; ni xamule ngu kukuluveta, nguko ni ha phangoni!

¹⁸Tshuketa hafuhi kwangu u ni hanyisa; ni ponise ka valala vangu!

¹⁹Awe wa si ziva siruko, tingana ni si eyiso si si nga ni xupha; awe wa va ziva valala vangu!

²⁰Siruko si ni bhandisete mbilu, se ni lwala. Ni lavile wo ni pfela wusiwana, aniko kha na mmana; kha na mana ni wammweyo wo ni tangalisa.

²¹ Va ni ningile nyongwa, yi maha sakudya sangu mbimo yi ni nga pfa ditora, va ni ningile vhinagre.

²²Mibuso yakwe yi na hinduke yi maha milawu, yi txi daya ene ni vale a nga va ramba.

²³Maso awe ma na phume, kasiku va si woni; siwunu sawe si na zumbe si txi dhudhumela.

²⁴Theketa txiviti txako txitimwi kwawe; va na hokelwe ngu dikhulo da kuhenya kwako!

²⁵ Wugovelo wawe wu na mahe txiwula kambe ku nga maneke ni wammweyo wo zumba matendani kwawe,

²⁶nguko vona va xanisa avale u nga va peka, va xowokisela avale u nga va tsayisa.

²⁷Va leke ve engetela mtalo wa sionho sawe u nga va tumetise ti to ve mana tsetselelo yako.

²⁸Va pfhute mu ka dibhuku dako da wutomi! U nga va veke mu ka mtengo wa vo lulama!

²⁹Aniko ani ni pandisekako ni kuxaniseka, ni wuse, u txi ni hanyisa, awe Txizimu.

³⁰Ni na dhumisa Txizimu txathu ngu tindando; ni na txi pfalisa ngu kubonga.

³¹Atiya ti na tsakisa ngutu ka Txizimu kupinda timhamba, madhuna ni marole.

³²Avale va ti vekako hahatshi va na ti wone ve tsaka ni vale va lavako Txizimu va nave ni kutsana,

³³nguko Txizimu txa engisa sikulungu txona kha txi tsakeli vathu va txona va di kupandisekani.

³⁴Dhumisani MKOMA anu tinzuma ni mafu, linene ni sotshe sivangwa si si ku ka lona!

³⁵Kha ditshuri, Txizimu txi na hanyisa Siyoni, txi txi aketa madhoropa a Judha, se va na wuya avale va nga ti tutumisilwe.

³⁶Vatukulu va sithumi sa Txizimu va na dya thomba ya Siyoni se va na aka koneyo avale va txi randako.