Read chopi Masalmo 7 Bible Online

Masalmo 7 - chopi bible

Masalmo 7

¹Ndando yi Dhavhidha a nga embelela ka MKOMAngu mhaka ya Kuxe, wa ka Bhenjamini MKOMA, Txizimu txangu, ni thavela kwako; ni hulukise ka votshe vale va ni xanisako, u txi ni hanyisa!

²Va nga thuka va txi ni vharulela nga ngonyamo, va txi ni bhenulela, ku txi pwateka ni wammweyo wa ku ni vhuna.

³Awe MKOMA, Txizimu txangu, ngako ni di mahile to biha, ngako manza angu ma di mahile txionho,

⁴ngako ni di tshumetete mndoni wangu wunene ngu wubihi, ngako ni di xanisile mlala wangu ti si nga ni fanelo,

⁵konaho mlala wangu a na ni hinge a txi ni ñola, a na ni wise hahatshi a txi ni phwarasela.

⁶Khukha u txi ema, ngu kuhenya kwako, MKOMA, u txi ni vhikela ka tshofu ya valala vangu. Wuka, Txizimu txangu, u txi womba awu a ku ni mnandu.

⁷Tshanganisa otshe matiko mata kurandela u txi ma fuma u di txitimwi ka txikhalo txako txa wukoma.

⁸MKOMA, ngawe u lamulako vathu. Ni lamule, MKOMA, madingano ni fanelo yangu ni lamule madingano ni hawa ni ku si nga ni mnandu, awe Nyatxitimwi.

⁹ Fuvisa wubihi wa vabihi tsanisa avale i ku vavanene, awe u wonisisako timbilu ni mialakanyo, awe u ku Txizimu txa kululama.

¹⁰Txitxhavangu txangu txi ni vhikelako i Txizimu, Muhanyisi wa timbilu to lulama.

¹¹Txizimu i mlamuli wo lulama, txona txa nyenyana ni txionho yotshe mbimo.

¹²Ngako m'thu asi hinduki, Txizimu txi na lota ditxhari da txona; txona txi kungile wulaho wa txona, txi wu riya

¹³txa xungameta tingove ta txona to tura. Txi lulamisile matxhari a txona o daya.

¹⁴Wonani m'thu wo soholoka wa lumwa ngu txionho, ana ni txirumbu txa wubihi se a na veleka makuhu.

¹⁵A kete diphala a txi di hokomisa kambe a tshumete a txi wela ka dona.

¹⁶Wubihi wakwe ni tshofu yakwe si na wele txitimwi ka msungo wakwe.

¹⁷Ni na dhumisa MKOMA ngu mhaka ya kululama kwakwe: Ni na embelela ni dhumisa MKOMA Nyatxitimwi.