Read chopi Masalmo 71 Bible Online

Masalmo 71 - chopi bible

Masalmo 71

¹MKOMA, ani ni themba awe; u nga ni leke ni wiswa tingana kala kupinduka.

²Ni ponise, u txi ni vhikela, awe u ku wo thembeka! Ni engise, u txi ni hanyisa!

³Awe maha m'vhikeli wangu ni wuthavelo wangu, awe u nga thembisa ku ni vhuna yotshe mbimo. Awe u dirigwi dangu ni mkhokhola wangu!

⁴Ni txhatxhise, Txizimu txangu, manzani ka m'thu wo biha, manzani ka m'bihi ni mxanisi,

⁵nguko awe, MKOMA, kukhukhela ha wananani kwangu u kuverela kwangu ni themba yangu.

⁶Awe u m'vhuneteli wangu, kukhukhela mndani ka mame wangu; kukhukhela kuvelekwani kwangu ngawe u ni xayisako! Ni na kudhumisa yotshe mbimo!

⁷Ni txixamaliso ka vavangi, nguko awe u wuthavelo wangu.

⁸Txisofu txangu txi na tale ngu ku kudhumisa ni wudhumo wako dotshe ditshiku.

⁹U nga ni tshotshe, kukumbani kwangu; u nga ni leke, ngako ni di gumile mtamo.

¹⁰Valala vangu va womba-womba ngu ku ni wukela; avale va lavako ku ni daya va langana txikungo,

¹¹va txi kha vona: “Txizimu txi mtshuralete; m'hingeni, mi mñola nguko, kha nga ho wo sikota ku m'hanyisa!”

¹²Txizimu, u nga ti hambukise kwangu; Txizimu txangu, kukuluveta u ta ni lwela!

¹³Va na kanganyiseke va txi haxulelwa avale va zamako ku ni daya! Va na xowokiswe ve wiswa tingana avale va ni navelelako dikhombo!

¹⁴Hambi keto, ani, ni na va ni kuthemba yotshe mbimo ni na simana ni txi kudhumisa.

¹⁵Dotshe ditshiku ni na huwelela ti to u hi hanyisile ni na xawutela mithumo yako ya kululama,

¹⁶hambiko yona yi si sikotiko kubalwa. Ani ni na xawutela mithumo yako ya mtamo, MKOMA, ni huwelela ti to ngawe wekha u ku wo lulama!

¹⁷U ni gondisile awe Txizimu, kukhukhela ha wananani kwangu se ni ngadi ni txi huwelela sidiwukiso sako.

¹⁸Se konkuwa, ni nga kumba ni basa misisi, awe Txizimu, u nga ni leke, nguko ni ngadi ni txi na xawutela ka liveleko liya ni ka va va nota, wukoma wako ni mtamo wako.

¹⁹Kuthembeka kwako, Txizimu, nga hombe ngutu kufana ni nzuma; u mahile simaha sa hombe. I mani a fananako ni nawe kani?

²⁰Awe u nga ni maha ni wona wubihi wawungi ni sixaniso, u na ni ninga kambe wutomi u na ni humisa diphalani ko hokoma ka mafu.

²¹U na engetela wuhombe wangu, u txi ni tangalisa kambe.

²²Ngu toneto, ni lava ku kudhumisa ngu kuveta haripa, ni txi dhumisa wuhombe wako, Txizimu txangu; ni lava ku ku embeleta ngu kuveta txitende, Txizimu txa Israyeli.

²³Ni na giya ngu kutsaka, ngako ni txi embelela tindando wotshe mmidi wangu wu na giya, nguko awe u wu hanyisile.

²⁴Dotshe ditshiku lidimi langu li na xawuta kululama kwako, nguko va xowokile ve tala ngu tingana vale va nga txi lava ti to ni welwa ngu dikhombo.