Read chopi Masalmo 75 Bible Online

Masalmo 75 - chopi bible

Masalmo 75

¹Disalmo da Asafe. Ndando. Ka mthangeli wa vaembeleli-Ngu wuembeleli waku “u nga Khundumuse.” Ha kubonga, awe Txizimu, athu ha kubonga! Ha dhana ditina dako; hi txi pfalisa sidiwukiso sako.

²MKOMA a khene: “Ka mbimo yi ni no yi pima, ni na lamula ngu kululama.

³Ngako ditiko di txi tsekatseka, kumweko ni sotshe sivangwa si ku ka dona, ani ni na tsanisa tiphande ta dona.”

⁴Ni ti khani ka sipumbu: Mi nga ti maheni sipumbu; Ni ka vaonhi ni ti khani: “Mi nga ti maheni sihwiri!”

⁵“Mi nga wukeleni Txizimu, mi nga ti maheni siphukuphuku, ngako mi txi bwabwata.”

⁶Kulamula kha kuti ngu wutxani mwendo mswa-ditambo, hambi ngu txiwulani, mwendo ngu mimangoni.

⁷Nguko Txizimu ngu txona i ku mlamuli: Vamwani txa va abanisa, aniko vamwani txa va txhatxha.

⁸Manzani ka MKOMA ku ni digombe do tala ngu vhinya yo bava ya kuhenya kwakwe, ayi ene a ningako vathu vo biha va ditiko, kasiku ve sela; se vona va sela kala kuheta tximinye txa kona.

⁹Aniko, ani, ni na dhumisa Txizimu kala kupinduka; ni na embelela ni dhumisa Txizimu txa Jakobe.

¹⁰Txona txa haxula mtamo wa vabihi, aniko txa engetela mtamo wa vavanene.