Read chopi Masalmo 76 Bible Online

Masalmo 76 - chopi bible

Masalmo 76

¹Disalmo da Asafe. Ndando. Ka mthangeli wa vaembeleli - ngu sivetaveta sa tingoti. Txizimu txa ziwa ditikoni ka Judha; ditina da txona nda wudhumo ditikoni ka Israyeli.

²Nyumba ya txona ya wukhongeli yi maneka Jerusalema; m'ti wa txona wu mmangoni ka Siyoni.

³Ngu koneyo a nga komolela kona sibhamu sa yimbi: Sitxhavangu, matxhari, malaho ni tingove.

⁴Wudhumo wako mbwa hombe, awe Txizimu! Wudhumo wako mbwa hombe ngutu kupinda tithundu ta so tekwa yimbini.

⁵Tindena ta hombe ti honyoletwe sa tona hambiko i nga ti vanyamitamo, kha va sikota kumaha txilo se va otete wukohe wawe wa magwito!

⁶Ngako awe Txizimu txa Jakobe, u txi va dhusa, sikotxikani sawe ni mahantxhi awe sa ema.

⁷Awe, MKOMA, wa thisa ka votshe; kuwalo wo tsana e tserama masoni kwako, ngako u di henyile.

⁸U di txitimwi nzumani wa zivisa kulamula kwako se ditiko da dhudhumela di malala,

⁹mbimo yile Txizimu txi nga khukha kasi kulamula kasi kutxhatxhisa votshe vale vo dikha ha mafuni!

¹⁰Txiviti txako txa kuhenyela vabihi txa hinduka txi maha wudhumo wako; vathu va va nga huluka kufa ngu yimbi va na maha m'buso wa ku kualakanya!

¹¹Mahani sithembiso ka MKOMA, Txizimu txanu, aniko txi ningeni asi mi nga txi thembisa. Otshe matiko a hafuhi ma na wuyise miningelo me ta luva Txizimu txi fanelako kuxoniphwa!

¹²Txona txa thavisa mtamo ka vakoma txi thela dizowa ka vafumeli va ha mafuni.