Read chopi Masalmo 78 Bible Online

Masalmo 78 - chopi bible

Masalmo 78

¹Txithokozelo txa Asafe Vathu vangu, engisani gondo yangu; engiselani ati ni mi gelako!

² Ni lava kuwombawomba ngu sidinganiso ni mi kombisa masambala a mbimo ya kale,

³timhaka ti hi nga tiengisa, hi txi ti gonda ati vakale vathu va nga hi xawutela.

⁴Kha hi na mbi sisela situkulwana sathu; totshe hi na xawutela ka tiveleko ti titako ta kupfaliswa ka MKOMA ni mtamo wakwe ni ta sidiwukiso si ene a nga si maha.

⁵Ene a ningile mithetho ka va ka Israyeli, a ningile mlayo ka situkulwana sa Jakobe. A leletile ka vakale vathu ti to ve gondisa milayo yiya ka situkulwana sawe,

⁶kasiku liveleko li litako li txi yi ziva ni vanana va va no velekwa ve xawutela ka vanana vawe ni vona;

⁷kasiku ve themba Txizimu va si divali ati txona txi nga ti maha; kasiku ve vekisa sirumo sa txona

⁸va si fani ni vatate vawe, i nga ti liveleko la sindaka-milayo, siphukuphuku i ku liveleko li nga mbi xayisa mbilu ya lona, ni moya wa lona wu nga mbi thembeka ka Txizimu.

⁹Vathu va nyumba ya ka Efrayime, va nga ti xomile malaho ni tingove, va to tutuma ve thava ka ditshiku da yimbi;

¹⁰kha va xonipha txitumelelano txawe ni Txizimu kambe va lambile kuvekisa mlayo wa txona;

¹¹va to divala ti txona txi nga va mahela, sidiwukiso si txona txi nga va komba.

¹²Masoni ka vakale vawe, Txizimu txi mahile sidiwukiso, ditikoni ka Egipta, libalani ka Zowani.

¹³Txi tute linene, kasiku vona ve txhatuka, txi emisile mati, ma txi nga diseta.

¹⁴Ni mitshikari, txi ti va komba nzila ngu direfu se, ni wusiku, txi ti va woninga nzila ngu mndilo.

¹⁵Txiwulani Txizimu txi bhandile marigwi txi va setile mati ngu mtalo wa ona.

¹⁶Txizimu txi humisile ngu mu ka dirigwi mati o khulunga awa ma nga txi khulunga ngu mtamo.

¹⁷Aniko vona va engetile ve onhela Txizimu, ve wukela Nyatxitimwi, kona txiwulani.

¹⁸Va lavile kuduka Txizimu, ve kombela sakudya, so tsakisa kunavela kwawe.

¹⁹Va to wukela Txizimu va txi kha vona: “Ina Txizimu txi nga sikota ku hi lulamisela sakudya kona txitingani muwa kani?

²⁰Kha ditshuri Txizimu txi pekile dirigwi se ngu ka dona me khulunga mati a kutala, kambe ina txi nga sikota ku hi ninga sakudya ni kululamisa nyama kasi vedya vathu va txona kani?”

²¹Ngako MKOMA a di engisile timhaka tiya, a to henya, e tsayisa vathu vakwe ngu mndilo se dikhulo dakwe di to simama di tura;

²²nguko kha va kholwa ka Txizimu kambe kha va themba kuvhunwa ngu txona.

²³Kha ditshuri, Txizimu txi to leleta marefu txitimwi txi tula marefu a nzumani;

²⁴txi to wisa manna masoni ka vathu; fulaho ya nzumani kasi ku vedya!

²⁵Votshe va dyite sakudya sa tingelozi! Txizimu txi va rumete sakudya sa kuenela!

²⁶Txi to humisa ngu nzumani diphuho da wutxani se ngu mtamo wa txona txi tisa diphuho da wulambwe!

²⁷Txi to rumela ngu nzumani nyama yo ninga vathu va txona; se si txi wa ngu nzumani sinyana so tala nga mtxhefa wa linene!

²⁸Txizimu txi si wisile hagari ka wugovelo ni madhawa otshe a matenda awe.

²⁹Sekoko va to dya ve khura ngu toneto Txizimu txi tsakisile kunavela kwawe.

³⁰Aniko va di ngadi va sinzi kudya va txi enelelwa kunavelani kwawe; va di ngadi ni sakudya mkanani kwawe,

³¹Txiviti txa Txizimu txi to va wela txitimwi txi daya tindena tawe; txi date vathu vo xonipheka va ka Israyeli!

³²Hambi keto, va to tamarisa ve onha va si kholwi ngu sidiwukiso sa Txizimu.

³³Ngu kumaha keto, Txizimu txi hetile masiku awe amu ka wukanganyisi, ni malembe awe amu ka xomulo.

³⁴Ngu kuwona vava Txizimu txi nga va tsayisa ngu lifo, vamwani va ti txi lava txona Txizimu; va ti tshumelela ka txona, va txi txi lava va si karali.

³⁵Sekoko va ti ti khumbula ti to Txizimu i m'vhikeli wawe, ni ti to Txizimu Nyatxitimwi i ti mtiruli wawe.

³⁶Aniko makungo a sisofu sawe i ti a makuhu; totshe ti va nga ti womba ti ti si nga ni ditshuri.

³⁷Timbilu tawe ti sa thembeka ka Txizimu hambi ni ka txitumelelano txa Txizimu, ti sa thembeka.

³⁸Aniko Txizimu, ngu wumbilu wa txona, txi ti va divalete sionho sawe, txi si va lovisi; sikhati so tala txi thindekile ku va henyela, txi si va kawuki ngu txiviti.

³⁹Txizimu txi alakanyile ti to vona nziwumbwa sa nyama dwe, va fana ni moya wu wu pindako wu si wuyi kambe!

⁴⁰Nzikhati singahi va nga eyisa Txizimu txiwulani va txi txi pandisa mbilu ditikoni mule ka kuoma!

⁴¹Va to tshumelela msana, ve duka Txizimu; sambe va kanakanile ngu wo Sawuleka wa ka Israyeli!

⁴²Va ti si alakanyi mtamo wa txona, wa ditshiku dile txi nga va hulukisa ka valala;

⁴³mbimo yi Txizimu txi nga komba mtamo wa txona ditikoni ka Egipta, txi txi mahetela sidiwukiso so thisa sa mtamo ditikoni ka Zowani;

⁴⁴mbimo yi txi nga hindula mati a mnambo ni milonga ya kona me maha mnoha, kasiku Vaegipta va si sikoti ku ma sela.

⁴⁵Txi va rumete mabhawu, ma txi va lumetela, ni makhele ma txi va daya.

⁴⁶Txi ningete timbewu tawe ka mipungu ni mihando ya mtamo wawe ka humbi.

⁴⁷Txi hetile tithembwe tawe ta mivhinya ngu maralala ni mimora yawe txi yi hisile ngu pheho.

⁴⁸Txi dayetete tihomu tawe ngu maralala ni tinvuta tawe ngu tinyangafula.

⁴⁹Txi to rinza txitimwi kwawe mndilo wa kuhenya ka txona, txiviti, dikhulo, dikhombo, kota txikombiso txa sixaniso.

⁵⁰Txi to leka kuhenya ka txona ku txi ya masoni, kha txa va hulukisa ka lifo! Txi to ningela wutomi wawe ka mtungu!

⁵¹Txi mahile ti to va txi fa vanana va matiwula va Egipta, matiwula a nyumba ni nyumba ya ka Hamu ma txi fa.

⁵²Txi humisile vathu va txona txi tsimbila navo ngu mu txiwulani, kota m'dyisi a golako sifuyo sakwe.

⁵³Txi va thangete ve tsimbila ngu kutsana va si thavi txilo, txi mbembisile valala vawe lineneni.

⁵⁴Txizimu txi tekile vathu va txona, txi va yisa ditikoni ka txona ko sawuleka, ka mmango wu txi nga wu teka ngu mtamo wa txona!

⁵⁵ Txi tutumisile vamatiko masoni ka Vaisrayeli, txi abanisela thomba yawe ka vathu va txona txi akisa tihunzu ta ka Israyeli matendani kwawe.

⁵⁶Aniko Vaisrayeli va dukile Txizimu Nyatxitimwi, ve txi wukela, va si vekisi milayo ya txona.

⁵⁷Va tshumelete msana, ve eyisa Txizimu kufana ni vatate vawe; va ti jikisile kufana ni wulaho wo gombonyeka!

⁵⁸Va henyisile Txizimu ngu mhaka ya siluvelo sa wuhedheni; va wusile txiluse txa Txizimu ngu kukhozela sithombe.

⁵⁹Txizimu txi engisile toneto, txi txi pandiseka, txi tsukula va ka Israyeli ngu txiviti.

⁶⁰ Txi lekile nyumba ya txona yo khozela ya Silo, i nga ti ditenda da txona do zumba ka dona hagari ka vathu.

⁶¹Txi lekile valala ve teka mtundu wa txitumelelano, i ku txikombiso txa wudhumo wa txona.

⁶²Txizimu txi henyile ngutu ngu mhaka ya vathu va txona, txi va lekile ve dawa ngu ditxhari da mlala.

⁶³Mndilo wu hisile otshe mazambi awe se mahorana me sala i di mabhoyi.

⁶⁴Vaphaxeli va datwe ngu ditxhari tinoni tawe kha ta sikota ku va saluka.

⁶⁵Sekoko MKOMA a to wuka, ku nga o vhumuka ngu ha wukoheni, ku nga ndena yi nga ambuluka kulevani ka vhinya.

⁶⁶A khozisile valala vakwe va txi tutuma ve thava; a txi va thela tingana ta yotshe mbimo.

⁶⁷Ngu toneto, a tshotshile nyumba ya Josefa e tsukula lihunzu la ka Efrayime.

⁶⁸A to sawula lihunzu la ka Judha ni mmango wa Siyoni, awu a wu randako.

⁶⁹A akile nyumba yakwe ya kukhozela, yo guleka nga nzuma a txi yi tsanisa kala kupinduka kufana ni mafu.

⁷⁰ A sawute kambe Dhavhidha txithumi txakwe, awu i nga ti m'dyisi wa tinvuta;

⁷¹a mthavisile ka mthumo wa kudyisa tinvuta, kasiku e maha m'dyisi wa liveleko la Jakobe, i ku vathu vakwe ni thomba yakwe.

⁷²Dhavhidha a xayisile vathu vakwe ngu kululama kotshe e va fuma ngu wuzivi wa hombe.