Read chopi Masalmo 79 Bible Online

Masalmo 79 - chopi bible

Masalmo 79

¹Disalmo da Asafe Txizimu, vamatiko va wulete ditikoni kwako, va nyenyezisile dithepele dako do sawuleka, didhoropa da Jerusalema va di mahile marumbi.

² Va lekile sirumbi sa vathu vako si dyiwa ngu magwana ni mimidi ya vakhongeli vako yi dyiwa ngu sihari sa txitinga.

³Va theketile mnoha wa vathu vako nga mati ka otshe madhawa a Jerusalema ku txi pwateka ni m'thu wo va tshotsha.

⁴Se hi maneka hi di sekisa hagari ka vaakelani vathu; avale va nga hi randela va hiseka ni ku hi tseketsela.

⁵MKOMA, u na hi henyela kala mbimo muni kani? Txiluse txako txi na fana ni mndilo wo tura kani?

⁶Henyela vathu ni mifumo ya vamatiko, ava va si ku ziviko, kambe va si ku khozeliko!

⁷Nguko vona va dayetete vathu vako se ditiko va di mahile marumbi.

⁸U nga hi tsayise ngu mhaka ya sionho sa vakale vathu; hi pfele wusiwana ngu kukuluveta, nguko mtamo wathu wu gumile!

⁹Hi lwele, Txizimu, Muhanyisi wathu; hi ponise u txi hi divalela, ngu mhaka ya wudhumo wa ditina dako do Sawuleka!

¹⁰Nguko vamatiko va na wotisa va txi kha vona: “Txizimu txako txi hani kani?” Va kombe vathuvo, masoni kwathu, kuphotela ka mnoha wa vathu vako, awu wu nga theketwa!

¹¹Engisa tihuwa ta vale va nga sungwa se, ngu konaho ka mtamo wako, hanyisa avale va nga abaniselwa kufa.

¹²MKOMA, va tsayise ka mtxhanu ni kambidi vaakelani vathu ngu mhaka ya sionho si va nga ku mahela.

¹³Athu hi ku vathu vako, hi ku tinvuta ta mtxhambi wako, hi na kudhumisa ngu ha ku si gwitiko, hi na embelela wudhumo wako ka liveleko ni liveleko!