Read chopi Masalmo 80 Bible Online

Masalmo 80 - chopi bible

Masalmo 80

¹Disalmo da Asafe. Wufakazi wokari. Ka mthangeli wa vaembeleli - ngu mpfumawulo wa “Makhoñwa.” Awe m'dyisi wa ka Israyeli, hi engise u kombisako nzila ka liveleko la ka Josefa kota mtxambi wako, hi engise, awe u ku ha txikhaloni txitimwi ka makerubhima, ti wonekise!

²Komba wuhombe wako ka tihunzu ta Efrayime, Bhenjamini ni Manasi! Wuka u txi ta hi hanyisa ngu mtamo wako!

³Awe Txizimu, tshumela u hi wusa, hi kombe liwoningo la khohe yako, kasi hi na hanya!

⁴MKOMA, Txizimu txa mtamo wotshe, u na henya kala mbimo muni u txi lamba kuengisa vathu vako va khongelako kani?

⁵U hi dyisile dipawu da mirongo, u txi hi seta digombe da kutala ngu mirongo.

⁶U hi mahile tikhumbi ti mifumo ya vaakelani yi bangelanako ngu tona, u lekile valala vathu va txi hi ruketela.

⁷Awe Txizimu txa Mabutho a Tiyimbi; tshumela u hi wusa, hi kombe liwoningo la khohe yako, kasi hi na hanya!

⁸U wuyisile ngu Egipta mndonga wa m'vhinya, u tutumisile vathu va mahedheni, u txi wu phaya.

⁹U wu lulamisete mafu, se wona wu mite mikoloti, wu txi na va, wu eneta dotshe ditiko.

¹⁰Mimango yi fenengetilwe ngu mtsudi wa m'vhinya se madhavi a wona me pinda kulapha ka mikedhari ya Txizimu.

¹¹Madhavi a wona ma navile kala lineneni se mathungedwa a wona me hoka mnamboni ka Ewufrate.

¹²Ngu kutxani u txi khundumusa libhiyo la thembwe yako, u leka avale va pindako ngu nzila va txi hapha mauvha a wona kani?

¹³Khumba ya txitinga ya khura ngu wona mndonga wule wa m'vhinya ni sihari sa txitinga sa wu dya.

¹⁴O awe Txizimu txa Mabutho a Tiyimbi, hi wone na u di nzumani, hi kukombela wonisisa ta tinene u xayisa m'vhinya wuwa.

¹⁵Xayisa m'vhinya wuwa u nga wu phaya, tximilwa txi u nga txi kulisa.

¹⁶Avale va nga ganga mndonga wuwa, va txi wu hisa, va fuvise ngu kuhenya kwako.

¹⁷Aniko katekisa m'thu wu awe u nga msawula, awu u nga mkulisa kasiku e kuthumela.

¹⁸Kha hi na mbi ngadi hi hambana ni nawe. Hi hanyise, kasiku hi na dhumisa ditina dako!

¹⁹MKOMA, Txizimu txa Mabutho a Tiyimbi, tshumela u hi wuyisa, hi kombe liwoningo la khohe yako, kasi hi na hanya!