Read chopi Masalmo 81 Bible Online

Masalmo 81 - chopi bible

Masalmo 81

¹Ngu ka Asafe. Ka mthangeli wa vaembeleli ngu mpfumawulo wa “Sigowolo.” Embelelani, mi dhumisa Txizimu, m'vhikeli wathu! Pekani mikulungwani ya kutsakela Txizimu txa Jakobe!

²Embelelani tindando, mi txi veta sikhitsi, embelelani, mi txi veta mbila ni haripa.

³Vetani mpundu wa kutsakela kumeka ka mtxima mi txi veta kambe ngu ditshiku da mtxima wa ngoma, i ku ditshiku da m'buso wathu wa hombe!

⁴Atiya, mlayo wa vanana va ka Israyeli, i mthetho wa Txizimu txa Jakobe.

⁵Mthetho wu va nga ningwa vanana va Josefa, mbimo yi va nga huma ngu Egipta. Ni engisile dipswi di ni si ziviko ku di pfa, di txi kha dona:

⁶“Ni humutile makata ako kurwala mrwalo wa kunemela; ni humutile manza ako kurwala masaka.

⁷Kuxanisekani kwako, u ni dhani ni ta kuhanyisa; ni ku angute, ni di direfuni ka txingwalangwanda, awe u nga ni duka matini ka Meribha.

⁸Engisani, vathu vangu, sileleto sangu; oh idiku wo ni engisa, Israyeli!

⁹ U nga lave simwani sizimu hagari kwako u nga khozele simwani sizimu.

¹⁰Ani MKOMA, ngani ni ku Txizimu txako, ngani ni nga kuhumisa ngu Egipta. Ni na kuninga sakudya yotshe mbimo u no pfa nzala.

¹¹Kambe ngamu yangu kha ya lava ku ni engisa; Israyeli kha komba kukhatala ngu ngani!

¹²Ngu toneto, ni va lekile ve maha kuranda kwawe ni kulondetela minavelo yawe.

¹³Idiku ngamu yangu yi ti ko ni engisa! Idiku Israyeli a ti ko londisela tinzila tangu!

¹⁴Nga ni di wisile tingana valala vakwe, nga ni di tsayisile avale va mu lwisako.

¹⁵Ava va nyenyako MKOMA, va ndi na wiswa hahatshi masoni kwakwe ku abaniswa kwawe ku ndi nava ka malembe ni malembe.

¹⁶Kambe ni ndi na mninga fulaho ya yinene ngutu, ni mkhurisa ngu wulombe wo huma ngu mu ka dirigwi.”