Read chopi Masalmo 85 Bible Online

Masalmo 85 - chopi bible

Masalmo 85

¹Disalmo da mtxawa wa Kora. Ka mthangeli wa vaembeleli MKOMA, awe u katekisile vathu vako. U tshumetete ka Israyeli tithomba takwe.

²U tsetselete minandu ya vathu vako, u divate sotshe sionho sawe;

³u emisile kutsukula kwako; u siwukisile dikhulo da kuhenya kwako.

⁴Hi wuyise kwako, Txizimu, muhanyisi wathu; u txi leka ku hi henyela!

⁵Ina txiviti txako txi na simama kala kupinduka kani? U na simama u txi hi henyela ngu ka liveleko ni liveleko kani?

⁶Khu na mbiswa u txi hi hanyisa, kasiku vathu vako va txi tsaka ngu ngawe kani?

⁷Hi kombe awe MKOMA, wumbilu wako u hi ninga kuhanyisa kwako!

⁸Ni na engisa atile Txizimu txi no womba. Kha ditshuri MKOMA a thembisile kudikha ka vathu vakwe, ka vathu va va m'thembako kasiku va si tshumeleli wupumbuni.

⁹Kha ditshuri kuhanyisa kwakwe ku hafuhi ka vale va m'thavako ni wudhumo wakwe wu na aka ditikoni kwathu.

¹⁰Lirando ni ditshuri si na manana; kululama ni kudikha si na pswopswana.

¹¹Ditshuri di na mila ngu ha mafuni kululama ku na txhika ngu nzumani.

¹²Ene MKOMA a na hi ninga makatekwa ni ditiko dathu di na ninga mihando ya dona.

¹³Kululama ku na thangela masoni ka MKOMA, kasi ku mlulamisela tinzila takwe.