Read chopi Masalmo 88 Bible Online

Masalmo 88 - chopi bible

Masalmo 88

¹Disalmo da mtxawa wa Kora. Ndando. Ka mthangeli wa vaembeleli - ngu txiya txa tingoti txo lumba mitxawa yimbidi ya vaembeleli Txithokozelo txa Hemani, muezira MKOMA, Txizimu txangu ni Muhanyisi wangu, wusiku ni mitshikari na ku kombela txivhuno.

²Amukela mkombelo wangu, engisa kudila kwangu!

³Ni karate ngu kuxaniseka ngutu, ni maneka hafuhi ni kufa.

⁴Se ni balwa mtengoni ka vafi, nguko se kha ni swi ni di ni mtamo.

⁵Ni lekilwe hagari ka vafi; ni fana ni vale se va nga kelelwa, ni fana ni vale va nga hambaniswa ni nawe avale se u si swiko u txi va alakanya.

⁶U ni tshotshile diphalani ko hokoma ngutu; diphalani ka txidema txo thisa.

⁷Txiviti txako txa ni nemela; u ni khubhunyetile ngu otshe mavimbi ako.

⁸U ni hambanisile ni vangana vangu; u ni mahile wo nyenyeza masoni kwawe. Ni fana ni wo khotelwa asi sikotiko kuhuma.

⁹Maso angu ma karate ngu kudila ngutu. Masiku otshe na kukhozela, MKOMA, na guleta manza angu ni txi khongela.

¹⁰Ina u nga maha sidiwukiso sako ka vafi kani? Ina vafi va nga sikota kuwuka va txi kudhumisa kani?

¹¹Ina m'thu a nga sikota kuhuwelela wunene wako diphalani kani? Mwendo kuhuwelela kuthembeka kwako a di mfumoni ka lifo kani?

¹²Ina va nga ziva sidiwukiso sako va di mfumoni ka txidema, ni kululama kwako ditikoni ka vale va nga divalwa?

¹³Aniko, ani, MKOMA, na dila kwako; ni mixo na kutisela mkombelo wangu.

¹⁴Ngu kutxani u txi ni nyenya, MKOMA, u txi ni sisela khohe yako kani?

¹⁵Kukhukhela ha wananani kwangu ni hanya ngu kuxaniseka ni kupandiseka; ni txi timisela sikarato so thisa sa kuhenya kwako.

¹⁶Txitimwi kwangu kupindile txiviti txako txa hombe; kuthisa kwako ku ni khozisile.

¹⁷Txiviti txako txi ni talete otshe masiku nga mavimbi, kufana ni mati a ndambi ma mitako.

¹⁸U ni hambanisile ni vangana ni vaakelani vangu; mpangalati wangu ngu txidema dwe.