Read chopi Masalmo 9 Bible Online

Masalmo 9 - chopi bible

Masalmo 9

¹Disalmo da Dhavhidha. Ka mthangeli wa vaembeleli - ni dipswi do khene “Kufa ka Mwanana.” Ani ni lava ku kudhumisa, MKOMA, ngu yotshe mbilu yangu, ni xawutela yotshe mithumo yako yo xamalisa.

²Ni na tsaka ngu litsako la hombe ngu ngawe, ni na embelela tindando ta kudhumisa ditina dako, awe Txizimu Nyatxitimwi.

³Valala vangu va tutuma masoni kwako, va humbwa, ve wa, va txi fa.

⁴Nguko wa vhikela fanelo yangu ni mhaka yangu, u di khalahatshile ha txikhaloni ka wukoma, u txi lamula ngu kululama.

⁵U kawukile mahedheni, u lovisile vabihi, u pfhita matina awe, kala kupinduka.

⁶Valala va fite, va lovile kala kupinduka; u khundumusete madhoropa awe, kuwalo wu a no va alakanya kambe.

⁷Aniko MKOMA a na fuma yotshe mbimo. Ene a longisete txikhalo txakwe txa wulamuli.

⁸A na lamula ditiko ngu kululama; e lamula mifumo ngu nzila ya ditshuri.

⁹MKOMA mbuthavelo wa va vo xaniswa, mbuthavelo ka mbimo yo pandiseka.

¹⁰Va kuthemba avale va ku zivako, nguko awe, MKOMA, khu tshuraleli ava va ku lavako.

¹¹Embelelani ka MKOMA, a fumako Siyoni, huwelelani mithumo yakwe hagari ka mifumo.

¹²Ene a alakanyela ava va xuphekako a txi va xayisa kha divali huwa ya va va xaniswako.

¹³Telwa ngu wumbilu ngu ngani, MKOMA! Wona kuxaniswa kwangu ngu vale va ni nyenyako. Ni khukhise ha ka matimba ya lifo,

¹⁴kasi ni na sikota kuembelela wudhumo wako ni di Siyoni ni txi tsaka ngu kuwa u nga ni hulukisa.

¹⁵Mahedheni ma hujumete ka diphala di ma ngadi kela; litshenga li va nga li riya li va bzwetile mikondo.

¹⁶MKOMA a ti wonekisile, kambe a lamute; nene m'bihi a bzwetilwe ngu mithumo yakwe yo biha.

¹⁷Vathu vo biha ni mahedheni, va kanetako Txizimu, magwito awe ngu kuya mndiloni.

¹⁸Kambe awu i ku txisiwana kha na mbi divalwa yotshe mbimo, ni kuthemba kwakwe kha ku na mbi luza ka yotshe mbimo.

¹⁹Khukha u txi ema, MKOMA, u nga leke vathu va txi kueyisa! Nguko m'thu kha nga ka wutxhukwana! Mahedheni ma na lamulwe masoni kwako.

²⁰MKOMA, va dhukise, va na ti zive ti to vona mbathu dwe.