Read chopi Masalmo 90 Bible Online

Masalmo 90 - chopi bible

Masalmo 90

¹Mkombelo wa Mosi, m'thu wa Txizimu MKOMA, awe u wuthavelo wathu ka liveleko ni liveleko.

²Na ku sinzi kuhumelela mimango, ku sinzi kumaheka mafu ni ditiko dotshe, kukhukhela ka kale, kala kupinduka, awe u Txizimu!

³Awe wa sikota kutshumeta vathu ve maha lithulu, ngu ku va gela ku khawe: “Tshumelani mi txi maha lithulu anu vanana va vathu!”

⁴ Kha ditshuri, digumi da mazana a malembe, kwako ma fana ni ditshiku da nyam'nova, di nga pinda; mwendo txikhatyana txa wusiku.

⁵Awe wa hiyela vathu hagari ka wukohe; ni mixo va fana ni mwasi wu nga gangwa,

⁶va fana ni mwasi wu thungako, wu gangwa ni mixo se ni minova wa wuna, wu txi oma.

⁷Kha ditshuri, ha sotelwa ngu txiviti txako; ha xaniswa ngu dikhulo dako!

⁸Awe u vekile sionho sathu masoni kwako wa landula sionho si hi nga si maha kusisalani.

⁹Otshe masiku a kuhanya kwathu ma komiswa ngu mhaka ya kuhenya kwako; malembe a kuhanya kwathu ma pinda nga kufuteta ka mihefemulo.

¹⁰Masiku a kuhanya kwathu nga mtxhanu wa magumi ni magumi mambidi a malembe; avale va ku ni mtamo va hoka ka mtxhanu wa magumi ni magumi mararu a malembe, aniko i malembe a sikarato ni kupandiseka. Nguko ma pinda ngu kukuluveta, se athu hi mwalala.

¹¹I mani a sikotako kuziva mtamo wa kuhenya kwako kani? I mani asi thaviko wurena wa kuhenya kwako kani?

¹²Hi gondise kubala masiku athu, kasiku timbilu tathu ti mana wutxhari.

¹³Wuya kwathu, MKOMA! U na henya kala mbimo muni? Telwa ngu wumbilu ngu vathu vako!

¹⁴Hi khurise ngu lirando lako i di ngadi mixo kasiku hi na tsaka, hi embelela ka otshe masiku a kuhanya kwathu.

¹⁵Hihe masiku a kutsaka madingano ni masiku awa u nga hi wonisa sixaniso ni malembe awa u nga hi wonisa makhombo.

¹⁶Komba mtamo wako wa hombe ka sithumi sako ni wudhumo wako wa hombe ka vanana vawe!

¹⁷Wu nate txitimwi kwathu wunene wa MKOMA, Txizimu txathu. Tsanisa MKOMA, mithumo ya manza athu, ina, tsanisa mithumo ya manza athu!