Read chopi Masalmo 92 Bible Online

Masalmo 92 - chopi bible

Masalmo 92

¹Disalmo. Ndando ya Masabbata Ti ni fanelo ku kubonga, awe MKOMA, ti ni fanelo ku kudhumisa ngu tindando, awe Nyatxitimwi!

²Ndinene kuhuwelela wumbilu wako ni mixo ni kunuwela ditshuri dako ni wusiku,

³ngu kuveta mbila ya digumi da makhokhoma ni haripa, ni kuembelela ngu txitende.

⁴Mithumo yako ya hombe, MKOMA, ya hi tsakisa! Mithumo yako ya hi ninga kuembelela ngu yotshe mbilu.

⁵MKOMA, mithumo yako nja hombe ngutu, mapimo ako ma etile ngutu!

⁶Mabhemba kha ma yi zivi mhaka yiya siphukuphuku kha si yi pimisi.

⁷Vathu vo biha hambi va txi anda kufana ni mwasi vabihi hambi va txi engeteleka, MKOMA a na va fuvisa kala kupinduka.

⁸Kambe awe, MKOMA, u wa hombe yotshe mbimo.

⁹Kha ditshuri, MKOMA, valala vako va na fuviswa, votshe vabihi va na hangalaswa.

¹⁰Ani u ni ningile mtamo wa nyari; u ni katekisile ngu ku ni tota mafura o bhumula ha msungo.

¹¹Ni va woni valala vangu ve xulwa, ni ti engisile tihuwa ta vale va nga ti lava ku ni wukela!

¹²Mlulami a na kula kufana ni mkhokho ene a na lapha kufana ni mndonga wa mkedhari wa Libhanoni.

¹³Kufana ni mindonga yi yi nga phaywa m'tini ka MKOMA, ene a na kula ha mthandani ka Txizimu txathu.

¹⁴Hambi yi di kumbile mindonga yile ya veleka mihando yi zumba yi di nonile ni kuhanya,

¹⁵kasi kukombisa ti to MKOMA a lulamile. Ngene txiwindi txangu txa wuthavelo, kwakwe kuwalo kukanganyisa.