Read chopi Masalmo 94 Bible Online

Masalmo 94 - chopi bible

Masalmo 94

¹MKOMA, awe u Txizimu txa kutsayisa wubihi! Txizimu, kombisa txiviti txako!

²Awe, u ku mlamuli wa ditiko, khukha u txi ninga va va kutikulisa, txhatxhazelo yi va fanelako ku yi amukela!

³Va na tsaka kala mbimo muni, MKOMA, va na tsaka kala mbimo muni avale va mahetelako kubiha kani?

⁴Votshe va va mahako kubiha va ti guleta, va ti kulisa ni kutiguleta ngu wubihi.

⁵Vona va xupha vathu vako, MKOMA, va xanisa vathu va va kulumbako.

⁶Va daya tinoni ni vo felwa ngu vaveleki, kumweko ni valuveli va va ku ditikoni kwathu.

⁷Vona va kha vona: “MKOMA kha hi woni; Txizimu txa Israyeli kha txi khatali ngu tona!”

⁸Anu sipumbu, mi na gonda mbimo muni kani? Anu vathu va mahundwa, mi na ziva mbimo muni, kani?

⁹Txizimu, txi nga maha tinzeve, kha txi na mbi engisa kani? Txona txi nga maha maso, kha txi na mbi wona kani?

¹⁰Awule a layako mifumo, kha na mbi yi tsayisa, kani? Ene ngene a gondisako vathu wuzivi!

¹¹ MKOMA a ziva mipimiso ya vathu; taku va pimisa ta wukanganyisi.

¹²A katekile m'thu wule u mkawukako awe MKOMA, ni wule u um'gondisako mlayo wako,

¹³kasi ku u mninga kuhumula amu ka masiku o biha, kala kuza di kelwa diphala da kutshotsha m'ubiha.

¹⁴MKOMA kha na mbi tshotsha vathu vakwe; ene kha na mbi tsukula avale i ku vathu vakwe.

¹⁵Ku na tshumela kumahwa kulamula ko lulama votshe vathu vo lulama timbilu va na kulondeta.

¹⁶I mani a no ema ni nani hilwa ni siphukuphuku kani? I mani a no ema ni nani hilwa ni vale va mahetelako kubiha kani?

¹⁷Kudotho nga ni di reletilwe diphalani ka lifo, idiku MKOMA a sa ni vhuna.

¹⁸Aniko ani ni ti khani: “Mikondo yangu ya rithimuka!” Konaho lirando lako, MKOMA, li tile li ta ni seteta.

¹⁹Hagari ka sikarato si si nga ni talela mapimoni kwangu, awe u ni khongotete, ni txi mana kutsaka.

²⁰Awe khu sikoti kusengela ni valamuli vo biha, nguko evo va teka wubihi va txi wu maha mlayo.

²¹Vona va maha sikungo so wukela m'thu wo lulama ve mu abanisela lifo awu a singako ni mnandu.

²²Aniko MKOMA ngene i ku wuthavelo wangu; Txizimu i dirigwi di di ni vhikelako.

²³A na maha ti to vabihi ve loviswa ngu sionho sawe, a na va fuvisa ngu konaho ka wubihi wawe. MKOMA, Txizimu txathu, a na va fuvisa!