Read chopi Masalmo 96 Bible Online

Masalmo 96 - chopi bible

Masalmo 96

¹Embelelani ka MKOMA ndando ya yiphya; vathu va dotshe ditiko, embelelani ka MKOMA;

²embelelani ka MKOMA, mi dhumisa ditina dakwe; ditshiku ni ditshiku dhumisani kuhanyisa kwakwe.

³Huwelelani nduma yakwe ka yotshe mifumo mi rurutela sidiwukiso sakwe ka totshe tixaka ta vathu,

⁴nguko MKOMA mbwa hombe, ana ni fanelo ya kudhumiswa, a fanete kuthawa kupinda sotshe sizimu!

⁵Sotshe sizimu sa vamatiko kha si vhuni txilo; MKOMA ngene a nga va nga tinzuma.

⁶Wudhumo ni wuhombe si masoni kwakwe; nyumba yakwe yo sawuleka yi ni mtamo ni kutshura.

⁷ Motshenu vathu va ha mafuni, dhumisani MKOMA dhumisani MKOMA ngu konaho ka wuhombe wakwe ni mtamo wakwe!

⁸Vekelani MKOMA txithavo txi txi fanelako ditina dakwe; wuyisani miningelo, mi ta luva siluveloni kwakwe!

⁹Khozelani MKOMA, na mi di ambate wusawuleki, mkombeni txithavo masoni kwakwe, anu vathu va ha mafuni!

¹⁰Gelani vathu va dotshe ditiko mi txi khanu: “MKOMA wa mfumeli!” Ngu toneto, mafu ma tsani, kha ma na kudekadekiswa; ene a fuma vathu ngu nzila yo lulama.

¹¹Yi na tsake nzuma, ma na tsake mafu; li na dhume linene ni sotshe si si ku mndani ka lona!

¹²Tithembwe ti na tsake, ni yotshe mihando ya tona! Mindonga ya txitinga, yi na kwangule ngu litsako,

¹³tsakani masoni ka MKOMA, nguko wata nguko a tela ku ta vhuna mafu; a na lamula ditiko ngu kululama, ni vathu ngu ditshuri dakwe.