Read chopi Masalmo 97 Bible Online

Masalmo 97 - chopi bible

Masalmo 97

¹MKOMA wa fuma. Ma na tsake mafu! Si na tsake sitondolo ngu wungi wa sona!

²MKOMA a randetwe ngu marefu ni txidema; ditshina da mfumo wakwe ngu kululama ni fanelo.

³Mndilo wu thangela masoni kwakwe wu txi hisa valala va va mrandelako.

⁴Kukeluka ka singwalangwanda sakwe kuwoninga ditiko; mafu ma si wona, me tsekatseka!

⁵Mimango ya nyivilika nga phula, masoni ka MKOMA Txizimu i ku nyamne wa otshe mafu.

⁶Tinzuma ta huwelela kululama kwakwe ni vathu votshe va wona wudhumo wakwe.

⁷Va na wiswa tingana votshe vale va khozelako sithombe, votshe vale va ti guletako ngu sizimu so mbi vhuna txilo; ni sotshe sizimu si na khizamele MKOMA Txizimu!

⁸Vathu va Siyoni va ti engisile ve tsaka; madhoropa a Judha ma nengela, nguko u nga lamula ngu kululama, awe MKOMA.

⁹Nguko awe, MKOMA, u mfumeli wa otshe mafu, u txitimwi ngutu ka sotshe sizimu.

¹⁰MKOMA wa randa avale va nyenyako kubiha wa vhikela wutomi wa vale va mthembako, wa va hulukisa manzani ka vabihi.

¹¹Kuwonekela kuwoninga vathu vavanene, ni litsako li rinzela ava va timbilu to lulama.

¹²Anu vathu vo lulama, tsakani ka MKOMA, mi txi dhumisa ditina dakwe do sawuleka!