Read chopi Masalmo 98 Bible Online

Masalmo 98 - chopi bible

Masalmo 98

¹Disalmo. Embelelani ka MKOMA ndando ya yiphya, nguko ene a mahile sidiwukiso! Diwoko dakwe da txinene di mningile kuxula, kuxula ku nga mahwa ngu diwoko dakwe do sawuleka.

²MKOMA a zivisile kuhanyisa kwakwe; masoni ka mifumo a kombisile kululama kwakwe.

³A alakanyile lirando lakwe ni kuthembeka kwakwe ka vathu va ka Israyeli. Hambi vathu va va ku magemeta-mitshi ka ditiko va ku woni kuhanyisa ka Txizimu.

⁴Huwelelani MKOMA ngu litsako, motshenu vathu va ha mafuni. Pekani mikulungwani ya litsako, nengelani mi txi embelela tindando.

⁵Embelelani tindando ka MKOMA mi txi veta mbila, mi txi veta mbila ni txitende,

⁶mi txi veta maposi ni mipundu. Tsakani masoni ka MKOMA, nguko ene ngene mfumeli.

⁷Li na dhume linene ni sotshe si si ku ka lona, di na embelele ditiko ni votshe vathu va dona.

⁸Minambo yi na peke manza ni mimango yi na peke mikulungwani ya litsako

⁹masoni ka MKOMA, a tako ku ta lamula ditiko, ku ta lamula ditiko ngu kululama, a txi lamula vathu ngu fanelo.