Read chopi Masalmo 99 Bible Online

Masalmo 99 - chopi bible

Masalmo 99

¹ MKOMA wa fuma; ma na dhudhumele matiko. Ene a khalahatshile txitimwi ka makerubhima. Mafu ma na dekadeka!

²MKOMA mbwa hombe mmangoni ka Siyoni; a txitimwi ka votshe vathu.

³Di na dhumiswe ditina da hombe da kuthisa, nguko dona di sawulekile.

⁴Awe u mfumeli wa mtamo, u randa kululama, ngawe u nga tsanisa asi i ku sa fanelo; u lamula ngu fanelo ni kululama vanana va Jakobe.

⁵Dhumisani MKOMA, Txizimu txathu; khizamani masoni ka txikhalo txakwe txa wukoma. Nguko MKOMA a Sawulekile!

⁶Mosi ni Aroni i ti vaphaxeli vakwe Samuwele i ti mmweyo wa vale va dhumisako ditina da MKOMA; vona va dhani MKOMA, se ene a va xamute.

⁷ Txizimu txi wombawombile navo txi di mndani ka marefu; vona va ti ti xayisa sileleto ni milayo yi txi nga va ninga.

⁸Awe MKOMA, Txizimu txathu, u va xamute! Kwawe u ti wonekisile kota Txizimu txi txi divalelako vathu, hambiko u nga si leki ku va tsayisa ngu sionho sawe.

⁹Dhumisani MKOMA, Txizimu txathu; mu khizameleni mmangoni kwakwe ko sawuleka! Nguko MKOMA, Txizimu txathu, a sawulekile!