Read chopi Mavingu 10 Bible Online

Mavingu 10 - chopi bible

Mavingu 10

¹Ndiya Mavingu a Solomoni. Mwanana wo txhariha a tsakisa tate wakwe, aniko mwanana wu i ku txiphukuphuku i xomulo ka mwamwakwe.

²Sisangala sa wubihi kha si vhuni txilo; aniko kululama ka txhatxhisa kufani.

³MKOMA kha leki dihika da wo lulama difa ngu nzala, aniko kunavela ka wo biha wa kutsivela.

⁴Awule a thumako ngu manza o kanganyisa wa maha txisiwana, aniko wa nonisa manza a vale va pfisisako.

⁵Awule a sengeletelako ngu mbimo yo funyela mwanana wo txhariha, aniko wule a otelako kuelulani, mwanana wo wisa tingana.

⁶Sikatekiso si ha msungo ka wule wo lulama, aniko kulwisa ka tsiva sisofu sa vaonhi.

⁷Ku alakanywa ka wo lulama ku katekile, aniko ditina da vaonhi di na sina.

⁸Mbilu yo txhariha ya amukela sirumo, aniko txiphukuphuku txo womba-womba ngutu txi na wiswa tingana.

⁹Awule a tsimbilako ditshurini a tsimbila a di tsani, aniko awule a sanulako tinzila takwe a na tumbulwa.

¹⁰Awule a valutelako ngu maso wa pfisa kupanda, kambe txisofu txa txiphukuphuku txi na wiswa tingana.

¹¹Txisofu txa wo lulama njisima txa wutomi, aniko kulwisa ka tsiva sisofu sa vo biha.

¹² Livengo li kujetela mazunga, aniko lirando la fenengeta sotshe sihambunyeto.

¹³Txisofuni ka txhari kumaneka wutxhari, aniko limhika li peka msana wa wule wo pwata mapimo.

¹⁴Titxhari ta ti xayisela wutxhari, aniko txisofu txa txiphukuphuku txo hasamula.

¹⁵Thomba ya nyatithombe, ngu yona i ku didhoropa dakwe do tsana; sisiwana si fuviswa ngu wusiwana wa sona.

¹⁶Mithumo ya m'thu wo lulama yi myisa kuhanyani, simaho sa muonhi si myisa kuonhani.

¹⁷Nzila yo yisa kuhanyani, yi lumba wule a xayisako kukawukwa, aniko awule a lekako kukawukwa wa hoheta.

¹⁸Awule a sisako livengo wa hemba ngu txisofu, ni wule a lumbetako njiphukuphuku.

¹⁹Amu ka mapswi o tala, kha ku pwateki txihoheto, aniko awule txisofu txakwe txi wombako ta tinene a txharihile.

²⁰Lidimi la m'thu wo lulama i silivhela yo sawulwa; mbilu ya vaonhi kha yi na mtengo wa txilo.

²¹Txisofu txa m'thu wo lulama txa dyisa votala, aniko siphukuphuku ngu kupwata mapimo, sa fa.

²²Txikatekiso txa MKOMA ngu txona txi ningako thomba ka m'thu, kambe ene kha na kuengetela txilo.

²³Kusakana dwe ka maha txiphukuphuku txi onha; na kuve ka m'thu wa mapimo, mbutxhari.

²⁴Kuthava ka wo biha, ku na wuya txitimwi kwakwe, aniko kunavela ka vo lulama ku na ningwa ngu Txizimu.

²⁵Wo biha a pinda kufana ni txihuhuri, aniko mlulami a ni kutsana ko mbi gwita.

²⁶Ku nga vhinagre amu ka makwasa, kufana ni wutshi amu ka maso, ngu toneto a ku ngu tona mkara ka vale va mrumako.

²⁷Kuthava MKOMA ka engetela masiku, aniko malembe a vo biha ma na komiswa.

²⁸Themba ya vo lulama ngu litsako, aniko kuverela ka vo biha ku na lova.

²⁹Nzila ya MKOMA njitsaniso ka vo lulama, aniko kufuviswa ku nata ka vale va mahako to biha.

³⁰M'thu wo lulama kha na mbi nga dhuka e zinginiswa, aniko vo biha kha va na mbi zumba ha mafuni.

³¹Txisofu txa m'thu wo lulama txi humisa wutxhari wo tala ngutu, aniko lidimi lo hambanisela li na wilwa.

³²Txisofu txa m'thu wo lulama txa ziva to tsakisa, aniko sisofu sa vo biha, sitate ngu wukanganyisi.