Read chopi Mavingu 11 Bible Online

Mavingu 11 - chopi bible

Mavingu 11

¹Txikalo txo dyelela wa txi venga MKOMA, aniko mpimo wo lulama wa mtsakisa.

²Ku txi ta kutikulisa, ti nata ni tona tingana; aniko avale vo ti veka hahatshi, va ni wutxhari.

³Kuthembeka ka vale vo lulama ku na va tsimbitisa, aniko wuhambunyeti wa sindaka-milayo wu na si haxula.

⁴Thomba kha yi na txivhuno ka ditshiku da kuhenya ka MKOMA, aniko kululama ka txhatxhisa kufani.

⁵Kululama ka m'thu wa ditshuri ku na lulamisa nzila yakwe, aniko awule wo biha a na wiswa ngu wubihi wakwe.

⁶Kululama ka vale vo kateka ku na va txhatxhisa, aniko avale i ku vabihi va na manwa ka wubihi wawe.

⁷A txi fa m'thu wule i ku muonhi, ni themba yakwe yi fite, ni themba ya wubihi ya mwalala.

⁸M'thu wo lulama wa txhatxhiswa kuxanisekani kwakwe, se muonhi e sala wukhaloni kwakwe.

⁹Mkanganyisi a haxula mwakelani wakwe ngu txisofu, aniko vo lulama va txhatxhiswa ngu wuzivi wawe.

¹⁰Didhoropa di tsakisa ku ti ni vo lulama; se ku txi lova vaonhi ku ni kutsaka ka hombe.

¹¹Ngu kukatekiswa ngu vo lulama, da tsaka didhoropa, aniko da haxulwa ngu txisofu txa vaonhi.

¹²Awule a txhipisako mwakelani wakwe mbwo pwata wutxhari, aniko awule a ku ni mapimo o malala.

¹³M'thu wa txibwebwe wa humisa txihunja, aniko awule a ku ni moya wo thembeka wa fenengeta mahungu.

¹⁴Ku si nga ni wuthangeli wo txhariha, vathu va wa, aniko ku di ni valayeli vavangi, ku ni kutsana.

¹⁵Kha ditshuri a na xaniseka wule a ti rwekako mnandu wa mkwawe, aniko awule a nyenyako maguwa, a na tsana.

¹⁶Wamsikati wo tsakisa wa xayisa kudhundeka, kufana ni vale i ku tindena va xayisako tithomba tawe.

¹⁷M'thu wa wunene wa mahela wunene moya wakwe apune, aniko awule i ku txigevenga wa xanisa nyama yakwe apune.

¹⁸Muonhi a amukela hakhelo ya wukanganyisi, aniko ka wule a phayako wululamo, ku nava ni hakhelo ya yinene.

¹⁹Nga kule wululamo wu yisako kuhanyani, ngu toneto awule a londisako to biha wa ti yisa kufani.

²⁰Avale va timbilu to biha njinyenyeko ka MKOMA, aniko avale tinzila tawe i ku tinene, va mtsakisa.

²¹Wo biha hambi a txo pata dianza ka dianza, kha na mbi huluka kutsayiswa, aniko liveleko la vo luluma li na huluka.

²²Kufana ni disinda da nzalama thonvuni ka khumba, ngu nga toneto wamsikati wo tshura a txi hambana ni ditshuri.

²³Vathu vo lulama va navela wunene dwe, aniko themba ya vaonhi ngu kuhenya.

²⁴Vaho vale va hangaliselako, aniko ve engetelwa kambe; ni vamwani va sengeletelako kupinda fanelo, aniko ve luzekelwa ngutu.

²⁵Moya wa wuha wu na ena, ni wule a theletelako mati, nene a na theletelwa.

²⁶Awule a sengeletako fulaho wa ruketelwa ngu vathu, aniko kukateka ku nava ha msungo ka mxavisi.

²⁷Awule a xotako wunene i di ngadi mixo wa ti lavela kusizeka, aniko ka wule a lavako wubihi wu nata txitimwi kwakwe.

²⁸Awule a thembako ka tithomba takwe a na wa, aniko vo lulama va na fana ni mwasi wo nakana.

²⁹Awule a khulumetelako mwaya wakwe, thomba yakwe ngu moya, se txiphukuphuku txi na thumela wule wa mbilu yo txhariha.

³⁰Mihando ya m'thu wo lulama mndonga wa wutomi, se wule a manako mihefemulo a txharihile.

³¹ Wona taku m'thu wo lulama wa tsayiswa ha mafuni; ngutu-ngutu m'thu wo biha, ni muonhi.