Read chopi Mavingu 12 Bible Online

Mavingu 12 - chopi bible

Mavingu 12

¹Awu a randako kukawukwa a randa wuzivi, aniko awule a vengako kulaywa njiphukuphuku.

²M'thu wa wunene a na mana kutsakelwa ngu MKOMA, aniko a na kona m'thu wa mapimo o hambana.

³M'thu kha na mbi tsaniswa ngu ta walo, aniko mitwi ya m'thu wo lulama kha yi na mbi dulwa.

⁴Wamsikati wamnene m'bhoti ka mwamna wakwe, aniko awule a wisako tingana a fana ni kusina mndani ka marambu akwe.

⁵Malakanyo a m'thu wo lulama manene, aniko sileleto sa muonhi nzo kanganyisa.

⁶Mapswi a muonhi ngo riyela kutheketa mnoha, aniko mawombawombelo a vo lulama, ma na va txhatxhisa.

⁷Vaonhi va na kanganyiswa, kambe va na fuviswa, aniko nyumba ya vo lulama yi na tsana.

⁸M'mmweyo ni mmweyo a na dhundwa ngu mapimo akwe, aniko awu a ku ni mbilu yo hambana, a na txhipiswa.

⁹A txhuko wule a ti dhumisako ngu sa sidotho na a di ni sithumi, kupinda wule a ti guletako apune na a txi pwata sakudya.

¹⁰M'thu wo lulama a khatalela wutomi wa sifuyo sakwe, aniko wumbilu wa vaonhi mbudayi.

¹¹Awule a dimako mafu akwe a na khura ngu sakudya, aniko awule a londetelako mikara kha nga ni mapimo.

¹²Muonhi a navela sile si hanyisako vo biha, aniko m'twi wa vo lulama wa ninga mihando ya wona.

¹³Mlawu wa muonhi wu ka mapswi o hambana a txisofu txakwe, aniko m'thu wo lulama a na huma kuxanisekani kwakwe.

¹⁴Mmweyo ni mmweyo a khura ngu mihando ya mapswi a txisofu txakwe, kambe m'thu a na amukela asi si thumwako ngu manza akwe.

¹⁵Txiphukuphuku txi ti wona txi di ka nzila ya yinene, aniko awule a engisako sileleto a txharihile.

¹⁶Kuhenya ka txiphukuphuku kha ku sweli kuzivaneka, aniko awule wo txhariha wa sisa tingana.

¹⁷Awule a wombako ditshuri a kombisa wululamo, aniko fakazi ya makuhu ya kanganyisa.

¹⁸Vaho vokari mapswi awe ma ku nga tsoka ya ditxhari, aniko mawombawombelo a txhari mbutomi.

¹⁹Mapswi a ditshuri ma na zumba yotshe mbimo, aniko mawombawombelo a makuhu, nga mbimo ya yidotho.

²⁰Wukanganyisi wu mbiluni ka vale va pimiselako to biha, aniko avale va navelelako kuthutha va ni litsako.

²¹Kha ku na txikarato ni txa tximwetxo txi nota ka wo lulama, aniko vaonhi va taletwe ngu wubihi.

²²Txisofu txo womba-womba makuhu, njinyenyeko ka MKOMA, aniko avale va tsimbilako ngu kuthembeka va mtsakisa.

²³M'thu wu a ku ni wuzivi wa sisa wuzivi, aniko timbilu ta siphukuphuku ti nuwela wuphukuphuku.

²⁴Manza a vale va wunene ma na thangela vamwani, aniko vakanganyisi va na va sithumi.

²⁵Kuvilela ka mbiluni ka gomisa m'thu, kambe mapswi amanene ma mtsakisa.

²⁶Mlulami mtsimbitisi wa mwakelani, aniko nzila ya vaonhi ya va maha ve timela.

²⁷M'thu wu i ku mkara a tandeka ni kubawula txile a nga daya, aniko thomba ya yinene ya m'thu ngu wunene.

²⁸Ka nzila ya wululamo ku ni wutomi, ni nzilani ka kuthuma, kha ku nga ni lifo.