Read chopi Mavingu 14 Bible Online

Mavingu 14 - chopi bible

Mavingu 14

¹Ni wihi wamsikati wu a nga txhariha wa ti akela nyumba yakwe, aniko awule wa txiphukuphuku a yi haxula ngu manza akwe.

²Awule a tsimbilako ngu ka wunene wakwe wa thava MKOMA, aniko awule a ku ka nzila yo wekela, wa mtxhipisa.

³Ngu mkanani ka txiphukuphuku kuhuma ndonga ya kutikulisa, aniko txisofu txa txhari txi na yi xayisa.

⁴Ku si nga ni tihomu, txisangala txi zumba diphanga, aniko ngu mtamo wa homu, kuho kuelula ko pfuna.

⁵Fakazi ya ditshuri kha yi na kuhemba, aniko fakazi ya makuhu yi wombawombela makuhu.

⁶Mtseketseli wa lava wutxhari asi wu mani, aniko ka wule wo pfisisa, wuzivi wa hehuka.

⁷Hambana ni m'thu wu i ku txiphukuphuku, nguko kwakwe khu na mbi mana mapswi a wuzivi.

⁸Wutxhari wa m'thu wamnene ngu kuziva nzila yakwe, aniko wuphukuphuku wa siphukuphuku wa kanganyisa.

⁹Siphukuphuku si poyilela txionho, aniko hagari ka vale vo lulama ku ni wunene.

¹⁰Mbilu ngu yona yi zivako kupandiseka ka yona, kambe mmwani kha na kupfa litsako la yona.

¹¹Nyumba ya vaonhi yi na haxuka, aniko ditenda da vale vo lulama di na phatima.

¹²Ku ni nzila yile m'thu a yi wonisako ku nga yi lulamile, aniko magwito ka yona ndinzila to yisa kufani.

¹³Hambi a txi seka, mbilu yi na panda, se magwito ka kutsaka ngu xaniseka.

¹⁴M'thu wa mbilu yo mbi thembeka a na kolwa ngu tinzila takwe, aniko m'thu wamnene, a na ti khurisa apune.

¹⁵Txiphukuphuku txi tumela otshe mapswi, aniko m'thu wo txhariha a xolisisa otshe mapswi.

¹⁶Txhari ya thava yi vayilela to biha, aniko txiphukuphuku txa henya txi ti maha txo tsana.

¹⁷Awule wo kuluveta kuhenya wa ti maha txiphukuphuku, ni m'thu wa mipimiso yo biha a na vengwa.

¹⁸Siphukuphuku si na wuyelwa ngu wuphukuphuku, aniko avale vo txhariha va na ti sanzeka wuzivi.

¹⁹Vo biha va ti namisa masoni ka vale vavanene, ni vaonhi masoni ka matimba a vo lulama.

²⁰Txisiwana txi nyenywa hambi ngu muakelani wa txona, aniko vangana va vanyatithombe mbavangi.

²¹Awule a txhipisako muakelani wa onha, aniko awule a xanisekelako sisiwana a katekile.

²²Ina kha va hoheti avale va mahako to biha kani? Aniko kukateka ni kuthembeka ku na lumba vale va mahako tinene.

²³Ka yotshe mithumo ku ni dibhindu, aniko mapswi a txisofu ma yisa wusiwanani.

²⁴M'bhoti wa titxhari ngu thomba yawe, wuphukuphuku wa siphukuphuku ngu wuphukuphuku wa sona.

²⁵Wufakazi wa ditshuri wa txhatxhisa mimoya ya vathu, aniko awule a ku ni siwombawomba mkanganyisi.

²⁶Mndani ka kuthava MKOMA ku ni themba yo tsana, kambe ku nava wuthavelo wa vanana vakwe.

²⁷Kuthava MKOMA njisima txa wutomi, kasi kuvhikela vathu ka milawu ya lifo.

²⁸Wuhombe wa mfumeli wu ha mtaloni ka vathu, kambe ku si nga ni vathu, wukoma wa guma.

²⁹Awule wo timisela mbwa hombe mu ka wutxhari, kambe awule wa magwava wa guleta wuphukuphuku.

³⁰Mbilu yo hanya kha kwati mbutomi wa mmidi, aniko dibava ngu sina ka marambu.

³¹Awule a xanisako txisiwana a ruka wule a nga txi vanga, aniko awule a xanisekelako txisiwana wa m'guleta.

³²Muonhi a na tshotshwa ngu wubihi wakwe, aniko awule wo lulama kala kufani kwakwe a ni themba.

³³Mbiluni ka txhari ku tate ngu wutxhari, aniko a ti ti ku mndani ka txiphukuphuku ta zivaneka.

³⁴Wululamo wa guleta matiko, aniko txionho ndingana ka vathu.

³⁵Mfumeli a tsakiswa ngu txithumi txo txhariha, aniko kuhenya ka mfumeli ku na wa txitimwi ka wule a tsimbilako ngu kuwekela.