Read chopi Mavingu 15 Bible Online

Mavingu 15 - chopi bible

Mavingu 15

¹Kuxamula ko ti veka hahatshi ka releta kuhenya, kambe mapswi o nemela ma wusa kuhenya.

²Lidimi la titxhari la tshurisela wutxhari, kambe txisofu txa siphukuphuku txi pupuma wuphukuphuku.

³Maso a MKOMA ma wona ka otshe makhalo, ma wonetela vabihi ni vavanene.

⁴Mndonga wa wutomi, ngu lidimi li li hanyako, kambe wubihi wa lona, wa funya muhefemulo.

⁵Txiphukuphuku txi txhipisa silayelo sa tate wa txona, aniko awule a xayisako kukawukwa, a na hanya kha kwati.

⁶Nyumbani ka m'thu wo lulama, kumaneka thomba ya hombe, aniko ka mihando ya muonhi ku ni ku khulumeteka.

⁷Sisofu sa titxhari si na theketa wuzivi, kambe mbilu ya siphukuphuku kha yi na mbi maha eto.

⁸Mphaxo wa vaonhi njinyenyeko ka MKOMA, aniko a tsakiswa ngu mkombelo wa vo lulama.

⁹Nzila ya muonhi njinyenyeko ka MKOMA, aniko ene a randa wule a tsimbilako ngu kululama.

¹⁰Kukawuka kuho txitimwi ka wule a lekako nzila, se wule a nyenyako silayo, a na fa.

¹¹Mndiloni ni kufani ka wonwa ngu MKOMA; kha na kutandeka kuwona timbilu ta vanana va vathu.

¹²Mtseketseli kha dhundi m'thu wule a mkawukako, hambi kutshuketela hafuhi ka wo txhariha.

¹³Mbilu yo tsaka ya tshurisa khohe ya m'thu, aniko ngu kupanda ka mbilu, wa funywa muhefemulo.

¹⁴Mbilu yo pfisisa ya xota wuzivi, aniko txisofu txa siphukuphuku txi na dyiswa ngu wuphukuphuku wa txona.

¹⁵Otshe masiku a m'thu wo xaniseka ma bihile, aniko awule mbilu yakwe yi tsakako, a ni m'buso wo mbi gwita.

¹⁶I txhuko kuva ni sa sidotho u txi thava MKOMA, kupinda kuva ni thomba ya hombe, na ku si nga ni kuthutha.

¹⁷I txhuko kudya mndiwo wa mazokoro, na ku di ni lirando, kupinda nyama ya homu yo nona, na ku di ni livengo.

¹⁸M'thu wa txihenyisani wa wusa mazunga, aniko wule wo timisela wa malata kulwa.

¹⁹Nzila ya mkara, yi fana ni lisanzu la mipa, aniko txinzilana txa vo lulama txi zumbisekile.

²⁰Mwanana wo txhariha a tsakisa tate wakwe, aniko m'thu wo mbi engisa mlayo a eyisa mwamwakwe.

²¹Wuphukuphuku litsako ka wule wo pwata mapimo, aniko m'thu wa mapimo a tsimbila ngu kululama.

²²Aha ku kuwalo mlayo, mithumo ya kona kha yi na dibhindu, aniko yi tsaniswa ngu madhota amangi.

²³M'thu a tsakiswa ngu xamulo ya txisofu txakwe, kambe dipswi do wombwa ngu mbimo ya kona, ndinene.

²⁴Nzila ya wutomi ya guleka ka wule a ku ni mapimo, kasi e hambana ni kuhiswani, ku manekako hahatshi.

²⁵MKOMA a na khundumusa nyumba ya vale vo ti guleta, aniko a na tsanisa thomba ya noni.

²⁶Mipimiso ya wo biha njinyenyeko ka MKOMA, aniko mapswi a vale va nga basa, ma mtsakisa.

²⁷Wule a ku ni wunavenave, a xanisa m'ti wakwe, aniko awule a nyenyako kupfhuhwa, a na hanya kha kwati.

²⁸Mbilu ya m'thu wo lulama ya pimisa ti a no xamula, aniko txisofu txa vaonhi, txi theketela sasingi so biha.

²⁹MKOMA a kule ni vaonhi, kambe a na engisela mikombelo ya vo lulama.

³⁰Litsako la maso la tsakisa mbilu, nduma ya yinene yi nonisa ni marambu.

³¹Awule a engisako milayo yo hanyisa, a na aka m'ti hagari ka titxhari.

³²Awule a lambako kukawukwa, wa txhipisa moya wakwe, aniko awule a engisako silayelo, wa mana kupimisisa.

³³Kuthava MKOMA i gondo ya wutxhari, se masoni ka kudhundeka, ku ni kutiveka hahatshi.