Read chopi Mavingu 16 Bible Online

Mavingu 16 - chopi bible

Mavingu 16

¹Kulongisela kuhuma mbiluni ka m'thu, aniko xamulo yita ngu txisofuni ka MKOMA.

²Tinzila ta m'thu ti basile masoni kwakwe ene nyamne, aniko MKOMA a kala mimoya.

³Veka themba ya simaho sako ka MKOMA, se mipimiso yako yi na maheka.

⁴Sotshe si a nga si maha MKOMA asi emisete mithumo ya sona, hambi ni muonhi a mahetwe ditshiku do biha.

⁵Ni wihi a ku ni mbilu yo ti kulisa njinyenyeko ka MKOMA; hambi a txo pata dianza ka dianza, kha na mbi huluka kutsayiswa.

⁶Wubihi wu thaviswa ngu wumbilu ni ditshuri; kuthava MKOMA, ka hulukisa vathu kubihani.

⁷Ngako tinzila ta m'thu ti txi tsakisa MKOMA, a maha taku m'thu e mana kuthutha ni valala vakwe.

⁸I txhuko kuva ni sa sidotho ni wululamo, kupinda kuva funyela so tala ku si nga ni wululamo.

⁹M'thu a londisa nzila ya mbilu yakwe, kambe matsimbilelo a kona a kombwa ngu MKOMA.

¹⁰Kuhutetela kuhuma txisofuni ka mfumeli; ka mbimo ya kulamula kha sikizi.

¹¹Lipimo la linene ni txikalo txo lulama nza MKOMA; otshe marigwi a kona ma mahilwe ngu ngene.

¹²Njinyenyeko ka vafumeli kumaha wubihi, nguko txikhalo txa wukoma txi tsaniswa ngu wululamo.

¹³Sisofu sa wululamo sa tsakisa vafumeli, se vona va dhunda wule a wombawombako timhaka to lulama.

¹⁴Txiviti txa mfumeli txi fanana ni mtumi wa lifo, kambe m'thu wo txhariha a na mmalata.

¹⁵Masoni ka khohe ya mfumeli ku ni wutomi, kambe wunene wakwe wu fana ni matshutshelo a nzuma.

¹⁶I txhuko ngutu kumana wutxhari kupinda kumana nzalama! Kambe i txhuko ngutu kumana mapimo kupinda silivhela.

¹⁷Nzila yo guleka ya vale vo lulama, ngu kuvayilela to biha; awule a veketako nzila yakwe a xayisa muhefemulo wakwe.

¹⁸Kutikukumukisa kuthangela kufuva, ni kutikulisa ngu moya kuthangela kuwa.

¹⁹I txhuko kuva wo ti namisa moyani ni vale vo divala, kupinda ku abanelana so handwa ni vale vo ti kukumukisa.

²⁰Awule a pfisisako dipswi ngu wutxhari a na mana wunene, ni wule a thembako ka MKOMA a na kateka.

²¹Awule a ku ni mbilu yo txhariha a na dhanwa ku i txhari, ni kutshambisela ka sisofu ku na engetela.

²²Avale va ku ni mapimo va ni txisima txa wutomi, aniko gondo ya siphukuphuku, njitsayiso ka sona sipune.

²³Mbilu ya m'thu wo txhariha, ya gondisa txisofu txakwe, kambe ya engetela gondo ka txisofu txakwe.

²⁴Mapswi o maheka dihesa da wulombe: Ma lombela muhefemuloni, me hanyisa marambu.

²⁵Ku ni nzila yile yi ku nga njinene ka m'thu, aniko magwito akwe ngu tinzila ta lifo.

²⁶Awule a thumako o ti thumela ene apune, nguko txisofu txakwe txa mkurumeta.

²⁷M'thu wule i ku diphanga, a xota ta walo, se txisofuni kwakwe ku manekisa ngu nga mndilo wo tura.

²⁸M'thu wa wubihi a wusa mazunga, se awule wo hemba a hambanisa vale va ku ni wungana ngutu.

²⁹M'thu wo karata wa kujetela mkwawe, ni ku mtsimbitisa ngu nzila yo biha.

³⁰A pfhumisa maso akwe e pimisela wubihi, e luma txisofu, e maha kubiha.

³¹Wunvi m'bhoti wo dhundeka, wu manekako ka mahanyelo o lulama.

³²I txhuko m'thu wo timisela kupinda ndena, ni wule a fumelako moya wakwe, kupinda wule a tekako didhoropa.

³³Xolo yi xaxuvelwa hammidi, aniko totshe ta tinene ti ta ngu ka MKOMA.