Read chopi Mavingu 19 Bible Online

Mavingu 19 - chopi bible

Mavingu 19

¹Txisiwana txi txi tsimbilako ka ditshuri da txona txi txhuko, kupinda txiphukuphuku txa txisofu txo tseketsela.

²Ni kona kuzumba moya wu si nga ni wuzivi hi nga ta tinene; ni wule a tutumako ngu mikondo yakwe wa onha.

³Wuphukuphuku wa m'thu wu na timeta nzila yakwe, se mbilu yakwe yi na henyela MKOMA.

⁴Tithomba ta manisa vangana vavangi, aniko txisiwana, txa lekwa ngu mngana wa txona.

⁵Fakazi ya makuhu kha yi na mbi va ni ditshuri; ni wule a wombawombako makuhu, kha na mbi huluka.

⁶Vo tala va dilela khohe ya dixonga da mfumeli, na kuve mmweyo ni mmweyo mngana wa wule a mningako txokari.

⁷Votshe vanawe va txisiwana va txi nyenya; ngutu-ngutu vangana va txona, va na tshuketela kule! Txa va londeta ngu kututuma txi va dhana, aniko kha va txi vhuni ngu txilo.

⁸Awu a manako mapimo wa randa muhefemulo wakwe; awule a xayisako wutxhari a na mana wunene.

⁹Fakazi ya makuhu kha yi na mbi huluka kutsayiswa; se ni wule a wombawombako makuhu, a na lova.

¹⁰Ka txiphukuphuku kha kulaveki kuzumbiseka; ngutu-ngutu ka txithumi kuva txi fuma ka vathangeli!

¹¹Mapimo amanene ma sisa kuhenya ka m'thu; se kudhundeka kwakwe ngu kuretha sihoheto.

¹²Kuhenya ka mfumeli, kufana ni kubhonga ka txingonyamwana; aniko wunene wakwe wu fana ni mwando txitimwi ka mwasi wo nakanna.

¹³Mwanana wo mbi engisa i xomulo ka tate wakwe, ni kututelwa ka mwamwakwe ko mbi gwita.

¹⁴Nyumba ni silo ngu sona i kuthomba ya vatate ka vanana; aniko wamsikati wamnene ata ngu ka MKOMA.

¹⁵Wukara wa maha m'thu e otela wukohe wo tshima, kambe m'thu wo kanganyisa a na fa ngu nzala.

¹⁶Awule a vekisako mlayo, a na vekisa muhefemulo wakwe; aniko awule a txhipisako tinzila ta tinene a na fa.

¹⁷Awule a ningako ka txisiwana o lombisa ka MKOMA, se ene a na tshumetelwa dibhindu da kona.

¹⁸Tsayisa mwanana wako ku di ngadi ni themba, aniko u txo m'daya, khu na mbi wusa moya wakwe.

¹⁹M'thu wa txihenyisani a na dawa ngu txona; nguko u txi mtxhatxhisa, u na tshumela u maha toneto kambe.

²⁰Engisa sileleto, u amukela kukawukwa, u na va txhari ka masiku ako o gwitisa.

²¹Mbiluni ka m'thu ku ni timhaka tatingi, aniko txileleto txa MKOMA txi na zumba yotshe mbimo.

²²Dibhindu da m'thu ngu tile a ti navelako; kambe txisiwana i txhuko kupinda wa makuhu.

²³Kuthava MKOMA ka yisa kuhanyani; awule a mthavako a na enelelwa, kambe kha na mbi telwa ngu dikhombo ni da dimwedo.

²⁴Mkara wa sisa dianza hammidi; e tandeka ni ku di yisa mkanani.

²⁵Tsayisa mtseketseli, se awule wa txiphuta a na gonda wutxhari; kawuka txhari, yi na gonda wuzivi.

²⁶Awule a xanisako tate wakwe mwendo kuxanisa mame wakwe, mwanana wo thela tingana, ni kupwata txithavo.

²⁷Ema kuengisa gondo mwanangu, ngako yi txi kuvayilelisa ka mapswi a wuzivi.

²⁸Fakazi ya Bheliyali yi tseketsela wululamo, se txisofu txa muonhi txi mita wubihi.

²⁹Wulamuli wu emisetwe vatseketseli, ni sisephu ka makata a siphukuphuku.