Read chopi Mavingu 2 Bible Online

Mavingu 2 - chopi bible

Mavingu 2

¹Mwanangu, ngako u txi tumela mapswi angu, ni kuveketa milayo yangu,

²kasi ku nzeve yako yi duketa kupfisisa wutxhari, ni kuva u namisa mbilu yako ka mapimo,

³se ngako u txi vilela mapimo, ni kuguleta dipswi dako ngu kulava wutxhari,

⁴u txi si xotisa kufana ni silivhela, u si lava kufana ni nzalama yo siswa,

⁵ngu kona u no pfisisa mhaka ya kuthava MKOMA, kambe u na mana kuziva Txizimu.

⁶Nguko MKOMA wa ninga wutxhari, kambe wuzivi ni mapimo sita ngu txisofuni kwakwe.

⁷Avale vo lulama, ene wa va vekela wutxhari wa ditshuri; txitxhavangu nja vale va tsimbilako ngu kuthembeka,

⁸kasi ku e veketa ditshuri ni wulamuli, ni kuxayisa nzila ya vasawuleki vakwe.

⁹Sekoko u na ziva wululamo, ni wulamuli, ni kudinganisa, ni dotshe ditshuri da dinene.

¹⁰Nguko wutxhari wu na wulela mbiluni kwako, ni wuzivi wu na va wa wunene amu ka dihika dako.

¹¹U na vekiswa ngu mialakanyo ya yinene, ni wutxhari wu na kuxayisa;

¹²kasi ku kutxhatxhisa ka wubihi, ni ka m'thu wo womba-womba kuhambana;

¹³ka vale va lekako ditshuri da wululamo, ve tsimbila ngu tinzila ta txidema;

¹⁴va tsakiswako ngu kumaha to biha, kambe va hefemula wuonhi wa vobiha,

¹⁵emo ditshuri da kona i ku do xanisa ni mithumo yawe i kuyo timetwa;

¹⁶kasi ku kutxhatxhisa ka wamsikati wa walo, kambe wa mamwani matiko, a tshambiselako ngu mapswi akwe,

¹⁷awule a lekako mngana wa wuphya wakwe, kambe e divala txitumelelano txa Txizimu txakwe;

¹⁸nguko nyumba yakwe yi wekelela kufani, ni tinzila takwe ka vafi;

¹⁹votshe vale va yako kona kha va na mbi wuya, kambe kha va na mbi yi mana nzila ya wutomi.

²⁰Kasi ku u na tsimbila ngu nzila ya vale vavanene, ni kuvekisa ditshuri da vo lulama.

²¹Nguko vo lulama va na zumba ha mafuni, ni vale vo thembeka va na zumba ka ona yotshe mbimo.

²²Aniko vaonhi va na dulwa ha mafuni, ni vakanganyisi va na lumbwa ngu kufuviswa.