Read chopi Mavingu 22 Bible Online

Mavingu 22 - chopi bible

Mavingu 22

¹Ditina da dinene da dhundeka ngutu, kupinda tithomba tatingi; ni wunene i txhuko kupinda nzalama.

²Nyatithombe ni txisiwana va mananile; votshe va mahilwe ngu MKOMA.

³Wo pfisisa wa wona phango e sisala; aniko avale vo divala va pinda ngu kona ve xaniswa.

⁴Hakhelo ya kutinamisa ni kuthava MKOMA, ndithomba, ni wudhundo, ni wutomi.

⁵Nzilani ka wo biha ku ni mipa ni milawu, awu a xayisako dihika dakwe, asi rethela kule.

⁶Gondisa mwanana nzila yi a no tsimbila ngu yona, hambi a txi kumba, kha na mbi yi leka.

⁷Nyatithombe a fumela sisiwana, ni wule a lombako somaha, a maha khumbi ya wule a nga lomba kwakwe.

⁸Awule a phayako kubiha, a na elula sixaniso; se ndonga ya kuhenya kwakwe yi na funyelekela.

⁹Awule a ku ni mawonelo amanene a na katekiswa, nguko waha sisiwana dipawu dakwe.

¹⁰Humisa hahanze mtseketseli, u na heta dizunga; mhaka ni tingana si na guma.

¹¹Awule a randako kubasa mbiluni, na a di ni lure la linene, a na maha mngana wa mfumeli.

¹²Maso a MKOMA ma xayisela wule a ku ni wuzivi, ni kutshotsha kule maalakanyo a m'bihi.

¹³Mkara a khene: Hahanze ku ni ngonyamo; ni txo huma ni na ya dawa tinzilani.

¹⁴Sisofu sa vavasikati va mabhemba maphala o tshima; ale a no wela ka ona wule a no henyelwa ngu MKOMA.

¹⁵Wuphukuphuku wu maneka mbiluni ka mfana, kambe ndonga yo tsayisa yi na wu tutumisa.

¹⁶Awule a khinyavezako txisiwana ngu kulava kutikulisa apune, mwendo wule a ningako nyatithombe, ngu ditshuri a na maha txisiwana.

¹⁷Riya nzeve u engisa mapswi a titxhari, mbilu yako yi na londise wuzivi wangu.

¹⁸Nguko ndinene kuveka wuzivi mbiluni kwako, ngako wuzivi wuwa wu txi zumba txisofuni kwako.

¹⁹Kasi kuthemba yako yi na va aka MKOMA, na kuninga wuzivi wuwa nyamsi, ina, awe kha ditshuri.

²⁰Ina kha ni khali ku kubhalela timhaka ta tinene madingano ni sotshe sileleto ni wuzivi,

²¹kasi ku kumaha u ziva kutsana ka mapswi a ditshuri, kuva u txi na xamula mapswi a ditshuri, ka vale va nga kurumela kani?

²²U nga pele txisiwana, nguko njisiwana, hambi kutsindaveta wule a xaniswako haditimbani.

²³Nguko MKOMA a na emela mhaka ya mxaniseki kulamulwani, kambe a na thavisa wutomi wa vale va va pelako.

²⁴U nga longoloke ni m'thu wa txihenyisani, hambi kutsimbila ni m'thu wa txiviti,

²⁵kasiku u si gondi tinzila takwe, se u mana mlawu wo thavisa wutomi wako.

²⁶U nga maneke hagari ka vale va xambanyako ngu kuñolana manza, ni vale va ti ningelako kudihela minandu ya vamwani vathu.

²⁷Ngako u si nga ni so diha ngu sona, ina kha va na mbi teka m'bhedhu wako kani?

²⁸U nga thavise mihingano ya kale, yile yi nga bhandwa ngu vatate vako.

²⁹U woni m'thu wa mapimo mbimo yile a thumako kani? A na vekwa masoni ka vafumeli; kha na mbi vekwa ka vathu va hahatshi.