Read chopi Mavingu 25 Bible Online

Mavingu 25 - chopi bible

Mavingu 25

¹Aawa ngu ona ni ona mavingu a Solomoni, aale ma nga txhamuselwa ngu vavamna vale va nga ti thumela Ezekhiya, mfumeli wa ka Judha.

²Txizimu txi dhundwa ngu ku txi nga sisa to maha; aniko kudhundeka ka vafumeli ngu loku va txi xola timhaka totshe.

³Kuguleka ka nzuma ni kutshima ka mafu, kha ku na kuxolwa, hambi ni timbiluni ka vafumeli.

⁴Thavisa nzambwa yi gololokako ha ka silivhela, kasiku muwumbi a na wumba ngu yona txiya.

⁵Thavisa muonhi masoni ka mfumeli, se txitulu txakwe txa wukoma txi na tsaniswa ngu kululama.

⁶ U nga ti gulete masoni ka mfumeli, hambi kutiveka ka wukhalo wa vahombe;

⁷nguko i txhuko va txi kugela ku kha vona: Kwela u txi ta hawa, kupinda kuwiswa tingana masoni ka mfumeli, a txi kuwona.

⁸U nga tutumele ku ti wuleta mu ko kanetisana, ngu magwito, u nga pwata ni to maha, se u xamalwa ngu mwakelani wako.

⁹Lulamisa mhaka yako ni mwakelani wako, kambe u nga humise txihunja txa mmwani m'thu;

¹⁰kasi ku asi ku thavisi lisima awule a no kuengisa, yi si khateli kwako nduma yo biha.

¹¹Mhaka yo wombwa ngu nzila ya yinene, yi fana ni mihando ya silivhela amu ka txiya txa nzalama.

¹²Awule a gondako ngu kuengisa sileleto, i txhuko kupinda singeda sa nzalama yo hehuka.

¹³Awule a wombako ditshuri di a nga rumwa; a fana ni kutitila ka hunguva ya mbimo yo elula, nguko a tsakisa dihika da nyamne wakwe.

¹⁴M'thu wule a ti dhundako ngu wuha wa makuhu, a fana ni hunguva ni moya ya kwa mbi nisa mati.

¹⁵Mthangeli a khongotelwa ngu kutimisela, mawombawombelo amanene ma funya marambu.

¹⁶U wu mani wulombe kani? Dyana wo kudingana; kasi ku u si kolwi ngu wona, u tshumela u wu kosa.

¹⁷U nga tate mikondo m'tini ka mwakelani wako, kasiku asi karali ngu ngawe, e kuvenga.

¹⁸M'thu wu a fakazako makuhu, e wukela mwakelani wakwe, txibando, ni ditxhari ni lingove lo hinda.

¹⁹M'thu wo mbi na ditshuri ngu mbimo ya xomulo, a fana ni dikwasa do phatuka, ni mkondo wo khuduka.

²⁰Awule a thulako ndando masoni ka m'thu wo pandiseka, a fana ni wule a thavisako syambalo ngu ditshiku da pheho, ni ku nga vhinagre txitimwi ka txilonda.

²¹Ngako mlala wako a txi pfa nzala, mninge dipawu e dya; ni kungako a ti ni ditora, mninge mati e sela,

²²nguko u na sengeletela makala a mndilo ha msungo kwakwe; se MKOMA a na ku hakela.

²³Moya wa wuphemba wa tisa nzuma yina, se lidimi lo kanganyisa, li thuvikisa khohe.

²⁴I txhuko kukhwekela ko tutelwa ngu mati, kupinda nyumbani ka hombe, ni wamsikati wa maguwa.

²⁵Mahungu amanene ota ngu ditikoni ka kule, ma fana ni mati o titila, ka dihika do karala ngu ditora.

²⁶M'thu wo lulama a txi xengwa ngu muonhi, a fana ni txiziva txa sivhinju, ni txisima txo sina.

²⁷Kudya ngutu wulombe hi nga ta tinene; ngu konaho, wudhundo wo ti xotela upune hi nga wudhundo.

²⁸M'thu wa kwa mbi xayisa moya wakwe, a fana ni didhoropa do khundumuselwa, do pwata diguma.