Read chopi Mavingu 26 Bible Online

Mavingu 26 - chopi bible

Mavingu 26

¹Txiphukuphuku kha txi hanelwi ngu wudhundo, nguko ti fana ni hunguva ngu mbimo ya lisani, ni mati ona ngu mbimo yo elula.

²Kuruka wo mbi na mnandu, kufana ni txinyana ni mbeluvelu si txi puruma-puruma kha kuvhuni txilo.

³Txisephu nja dihantxhi, matomu nja mbongola, se limhika nda msana wa siphukuphuku.

⁴Txiphukuphuku u nga txi xamule madingano ni wuphukuphuku wa txona, kasi ku na nawe u si fanani natxo.

⁵Xamula txiphukuphuku ngu nzila yo txi komba wuphukuphuku wa txona, kasiku txi si ti woni txi di txharihile.

⁶Awule a rumako txiphukuphuku kuheleketa dipswi, wa ti wila minenge, ni ku tiha dikhombo.

⁷Divingu do huma mkananani ka txiphukuphuku, di fana ni minenge ya txilima, ya kwa mbi txi vhuna txilo.

⁸Awule a ningako lisima txiphukuphuku, a fana ni wule a khweketako dirigwi aha ka txibhalakaza.

⁹Divingu da mkanani ka txiphukuphuku, di fana ni mpa wo thola dianza da didevi.

¹⁰Awule a tumelako kuthumelwa ngu siphukuphuku ni ku si holela, a fana ni wule a fulako votshe vathu ngu wulaho.

¹¹Nga yimbwa yi tshumelelako ka makosa a yona, ngu tona eto ni txiphukuphuku, kha txi leki wuphukuphuku wa txona.

¹²Ina u ti nga wona m'thu wo ti wona apune taku a txharihile kani? I txhuko txiphukuphuku kupinda eyo m'thu.

¹³Mkara a khene: Ku ni ngonyamo hanzila; ku ni ngonyamo digondoni.

¹⁴Mkara o ti rindilita-rindilita ha m'bhedhuni kwakwe, kufana ni ditimba misasimoni ka dona.

¹⁵Mkara a ziva kubeta dianza dakwe mbiyani, aniko wa tandeka ku di tshumeta diya mkanani kwakwe.

¹⁶Txiphukuphuku txi ti wona txi di txharihile ngutu, kupinda mtxhanu wa vavamna ni vambidi vo xamula ta tinene.

¹⁷Awule aku a txi pinda, e wulelela timhaka ta vamwani, a fana ni wule a ñolako yimbwa ngu tinzeve ta yona.

¹⁸A fana ni txiphukuphuku txi humisako titshatsha, tingove, ni simwani si dayako,

¹⁹ngu toneto ni m'thu wule a kanganyisako mwakelani wakwe a txi khene: Ni ti ko ku sakanisa.

²⁰Ku si nga ni tikhuni, mndilo wu na timeka; kambe ku si nga ni va malengo, dizunga di na guma.

²¹Nga makala txitimwi ka makala a mndilo, ni tikhuni ha ka mndilo, ngu toneto m'thu wa txiluse wa wusa mazunga.

²²Mapswi a m'thu wo womba-womba ta walo, ma fana ni sakudyanyana so lombela, sile si relelako mrumbuni.

²³Txisofu txo hinda, ni mbilu yo biha, si fana ni txikandyana txo nameketelwa silivhela.

²⁴Awule a ku ni livengo a xengisa ngu txisofu txakwe, na kuve mbiluni kwakwe a sisa wukanganyisi.

²⁵A txi kukhongotela ngu mapswi o tshamba, u nga mthembe, nguko mbiluni kwakwe ku ni mtxhanu wa sinyenyeko ni simbidi.

²⁶Livengo lakwe hambi li txi sisala ka wukanganyisi wakwe, wubihi wakwe wu na tumbuleka mtaloni ka vathu.

²⁷Awule a kelako diphala, a na wela ka dona; hambi wule a rindilitako dirigwi, di na gwitisa ku mtxika.

²⁸Lidimi la makuhu la venga vale li nga va xanisa, ni txisofu txo tshambisela txa lovisa.