Read chopi Mavingu 27 Bible Online

Mavingu 27 - chopi bible

Mavingu 27

¹ U nga ti thembisele ngu ditshiku da mangwana, nguko khu ti zivi ati di no kuninga ditshiku da mangwana.

²Dhundwa ngu mmwani, na i si nga ngu txisofu txako, mmwani m'thu na i si nga txisofu txako.

³Dirigwi da nemela, mafu ni ona ma nemela; aniko kuhenya ka txiphukuphuku ka nemela kupinda sona.

⁴Txiviti txi bihile, ni kuhenya i ndambi, se i mani a no ema masoni ka dibava kani?

⁵I txhuko kukawukwa ha kubasani, kupinda lirando lo zumba kusisalani.

⁶Ku dawiswa ngu mngana i txhuko, aniko kupswopswa ngu mkanganyisi ka vengeka.

⁷M'thu wu a nga khura a kandetela ni dihesa da wulombe, aniko ka nyanzale, sotshe so bava sa lombela.

⁸M'thu wu a ku kule ni m'tini kwakwe, a fana ni txinyana txo maneka kule ni txisaka txa txona.

⁹Mafura ni sotshe so nungela si tsakisa mbilu; ngu toneto ni sileleto sa mngana, ka wule a lwalako.

¹⁰U nga leke mngana wako, hambi mngana wa tate wako, kambe u nga wulele nyumbani ka mwananu ngu ditshiku da mazunga.

¹¹Txhariha mwanangu, u tsakisa mbilu yangu, kasiku ni mana txokari txo xamula ka wule a no ni txhipisa.

¹²Awule a zivako a wona phango e sisala; aniko siphukuphuku si pinda ngu kona si xaniseka.

¹³Ngako m'thu wokari a txi ti emisela kudiha mnandu wa mmwani, ñola simaha sakwe ngu mhaka ya m'thu wule mmwani.

¹⁴Awule a phindulelako kuya angula mngana wakwe, ngu dipswi do kwangula, a balwa to kha vona wa ruketela.

¹⁵Kututa ka ditshiku da kuwa ka mati, ni wamsikati wa mazunga, sa fana.

¹⁶Ni wihi wule a mmalatako, ti fana ni kutsimbisela moya; ni ku nga a to fumbareta mafura.

¹⁷Kufana ni simbi yi lotako yimwani simbi, ngu toneto kambe ni m'thu, wa thuvikisa khohe ya mmwani.

¹⁸Awule a xayisako mkuwu, a na dya mihando ya wona; se awule a xayisako nyamne wakwe a na dhundeka.

¹⁹Kufana ni khohe matini yi fanako ni khohe, ngu toneto ni mbilu ya m'thu yi tekelela m'thu wa kona.

²⁰Mndiloni ni kutimelani kha si dhuki si khura, hambi ni maso a m'thu kha ma dhuki me kolwa.

²¹Khadi njo xola silivhela, se mndilo mbwo xola nzalama, kasi m'thu a dukwa ngu wudhundo.

²²Hambi i diku wo sinza txiphukuphuku ngu dianza da mafaka, nga wu si khukhi wuphukuphuku wa txona.

²³Txharihela kuziva dihanyo da tinvuta tako; veka mbilu yako txitimwi ka mtxhambi wako.

²⁴Nguko tithomba hi nga ta kwa mbi gwita; ina m'bhoti wu ndi na pindukela ka liveleko ni liveleko kani?

²⁵Mwasi wa thaviswa, kumila wa wuphya; se ka patelwa mwasi wa mimangoni.

²⁶U na ambekwa ngu sinvutana, se vamabhongwe, mtengo wo xava thembwe.

²⁷Se ku na maneka masi amangi a tiphongo kasi ku u txi dya, u dyisa mwaya wako, ni kudyisa sithumi sako sa txisikati.