Read chopi Mavingu 3 Bible Online

Mavingu 3 - chopi bible

Mavingu 3

¹Mwanangu, u nga divale kulaya kwangu, kambe mbilu yako yi na vekete milayo yangu.

²Nguko milayo yi na engetela masiku ako, kambe yi na kuengetela malembe a kuhanya ni kuthutha.

³Wunene ni kuthembeka si nga ku leke; si sungelele thamoni kwako; si bhale ka txileti txa mbilu yako.

⁴ Se u na mana kukateka ni mapimo amanene, masoni ka Txizimu ni ka vathu vavanene.

⁵Themba ka MKOMA ngu yotshe mbilu yako, kambe u nga thembe mapimo ako upune.

⁶Alakanya ene ka totshe tinzila tako, se ene a na lulamisa tinzila tako.

⁷U nga ti wone u di txharihile upune; thava MKOMA, kambe hambana ni kubiha.

⁸Eto ti na maha mrende ka m'dhende wako, ni moloko ka marambu ako.

⁹Dhunda MKOMA ngu thomba yako, ni sotshe so khata sa mu ka dibhindu dako;

¹⁰se sisangala sako si na tala ngutu, kambe mapipa ako ma na thekelela ngu vhinya.

¹¹Mwanangu, u nga eyise silayelo sa MKOMA, kambe u ngave ni txihenyisani va txi kukawuka.

¹² Nguko MKOMA a kawuka wule a mrandako, kufana ni tate, ka mwanana wule a mnavelelako wunene.

¹³A katekile m'thu wule a manako wutxhari, ni m'thu wule a manako wuzivi.

¹⁴Nguko i txhuko siya sa wutxhari kupinda siya sa silivhela, ni dibhindu da kona kupinda nzalama yo hehuka.

¹⁵Wutxhari mbunene ngutu kupinda sotshe so navetisa, ni sotshe si u nga sikotako ku si navela, kha si na ku dinganiswa ni wutxhari.

¹⁶Kuengetelwa ka masiku ku ka dianza da txinene da wutxhari; ka da txibhabha kumaneka tithomba ni kudhundeka.

¹⁷Tinzila ta wutxhari ndinzila to tsakisa, ni tinzila ta kona nda kuthutha.

¹⁸Wutxhari mndonga wa wutomi ka vale va wu ñolisisako, kambe va katekile votshe vale va wu veketako.

¹⁹MKOMA, ngu wutxhari, a vangile mafu; e veketetela nzuma ngu wutxhari.

²⁰Ngu wuzivi wakwe, ku tulekile kuhokoma, se ni marefu ma tshatshela mwando.

²¹Mwanangu, atiya ti ngave kule ni maso ako; veketa wutxhari wa wunene, ni kupfisisa;

²²nguko si na maha wutomi wa dihika dako, ni tikatekiso mkoloni kwako.

²³Sekoko u na tsimbila ngu kutsana nzilani kwako, kambe kha wu na mbi gutwa mkondo wako.

²⁴Mbimo yi u no otela, khu na mbi thava; ngako u txi na otela, ni wukohe wako wu na va wo tsakisa ka wusiku wotshe.

²⁵U nga thave tiphango ti titako ngu txidhukisa, hambi kuxaselwa ka vaonhi kutxita.

²⁶Nguko MKOMA a na va themba yako, kambe a na vhikela mikondo yako ti to yi si bzwetwi.

²⁷U nga va tone somaha a vale si va lumbako, na mtamo wo maha eto wu di manzani kwako.

²⁸U nga wombe ka mwakelani wako taku: Tsula, u na wuya, ni nata kuninga mangwana, na kuve u naso.

²⁹U nga pimisele to biha ngu mwakelani wako, nguko a zumba ni nawe ngu kuthembeka.

³⁰U ngalwe ni m'thu hahanze ka mhaka yokari, na asi zivi ku ku mahela to biha.

³¹U nga ve ni dibava ni m'thu wo lwisa, kambe u nga sawule ni ya yimweyo ka tinzila takwe.

³²Nguko muonhi njinyenyeko ka MKOMA, aniko txihunja txakwe txi ni vale vo lulama.

³³Txiruko txa MKOMA txi zumba nyumbani ka muonhi, aniko ene a na katekisa aha a zumbako kona m'thu wo lulama.

³⁴Kha ditshuri ene a na xanisa vatseketseli, aniko a na ninga kukateka ka vale vo thutha.

³⁵Thomba ya titxhari ngu wudhundo, aniko siphukuphuku sa ti lavela pfilu-pfilu.