Read chopi Mavingu 30 Bible Online

Mavingu 30 - chopi bible

Mavingu 30

¹Mapswi a Aguri, mwana Jake, xolo. Wamwamna wuwa, a to khene ka Itiyeli. Ka Itiyeli ni ka Ukali.

²Ngu ditshuri ani kha ni zivi txilo kupinda votshe; kha ni nga ni mapimo a wuthu,

³kambe kha na gonda wutxhari, hambi ku m'ziva Msawuleki.

⁴I mani a nga nga kwela nzumani, e gwita e txhika kani? I mani a nga nga fumbareta moya ngu manza kani? I mani a nga nga phutela mati amu ka simaha kani? I mani a nga nga veka mihingano ya mafu kani? I mani ditina dakwe, ni ditina da mwanana wakwe, mwendo wa di ziva kani?

⁵Otshe mapswi a Txizimu ngo Sawuleka; nzitxhavangu ka vale va thembako ka txona.

⁶U nga engetele txilo ka mapswi akwe, kasi u si ti layi, u maneka u di hembile.

⁷Ni ku kombete silo simbidi; u nga ni tone, ni sanzi kufa:

⁸Vayilelisa wukanganyisi kwangu, ni mapswi a makuhu; u nga ni ninge hambi wusiwana mwendo tithomba; ni ninge sakudya sa ku ni enelela.

⁹Kasi ku ngu kupfa kukhura, ni si ku kaneti, ni txi khani: I mani MKOMA kani? Mwendo ku ni di txisiwana, nipa, ni wukela Txizimu ngu dianza dangu.

¹⁰U nga lenge txithumi masoni ka nyamne wa txona, kasiku txi si ku ruki, u mana mnandu.

¹¹Ku ni liveleko li rukako tate wa lona, kambe li si dhundiko mwamwa lona.

¹²Ku ni liveleko li ti wonako li di sawulekile, na kuve kha li zivi ka nga kuwulwa kubihani ka lona.

¹³Ku ni liveleko lo ti wona li ti gulekile, ni timboni ta kona ti kombako txitimwi.

¹⁴Ku ni liveleko lile makwasa a lona i ku matxhari, na kuve sisofu sa kona ndimesa, kasi ku li lovisa vathu vo xaniseka, ni sisiwana, ha mafuni.

¹⁵Mtshundwa wu ni vanana vambidi va ku kha vona: Ni ninge, ni ninge. Simaha si sasiraru kha si dhuki si khura; ni mune si si dhukiko si txi kha sona: Ti dingani:

¹⁶Dithitha, ni mrumbu wa txifule, mafu ma si khuriko ngu mati, ni mndilo wu si dhukiko wu txi kha wona: Ti dingani.

¹⁷Maso ale ma poyilelako tate mwendo kutxhipisa ngu kwa mbi engisa mame, ma na xokolelwa ngu magwana a txinambwanani, se me dyiwa ngu sisondo sa digama.

¹⁸Ku ni simaha siraru si ni xamalisako, ni txa wumune ni si txi ziviko:

¹⁹Nzila ya digama nzumani, nzila ya mnyoka ha ka marigwi, nzila ya txitimela hagari ka linene, ni nzila ya wamwamna ni mbiri.

²⁰Ngu toneto, ni nzila ya wamsikati wa digelegele: Ene wa dya, e bahulela txisofu txakwe, a txi khene: Kha na maha to biha.

²¹Ngu silo siraru ma zinginika mafu, ni txa wumune txi sikotiko ku ma tsanisa:

²²I ku txithumi mbimo yile txi ku ta fuma; ni txiphukuphuku ngako txi txi khura ngu sakudya;

²³ngu wamsikati wo vengelwa mbimo yi a txhadhako; hambi txithumi mbimo yi txi dyako thomba ya nyamne wa txona.

²⁴Simaha siya sa mune, nzimweso ka sile sa sidotho ha mafuni, kambe u txi tiziva, si nga ningwa wutxhari kha kwati:

²⁵Titshokoti lixaka la lisima ngutu; mbimo ya kuhisa ti sengeletela sakudya sa tona;

²⁶minvunza lixaka la wukheta; hambi keto, yi aka tinyumba ta yona marigwini;

²⁷tihumbi kha ti nga ni mfumeli; aniko totshe ta huma, ti abanelana ngu mitxawa;

²⁸nyazombe wa ñolwa ngu manza, kambe wa maneka tinyumbani ka vafumeli.

²⁹Ku ni siraru si ku ni matsimbilelo amanene, ni txa wumune txi tsimbilatsimbilako ngutu:

³⁰Ngonyamo, i ku ya mtamo ngutu hagari ka sihari, kha yi tshumetelwi msana ngu m'thu;

³¹dihantxhi da yimbi, na di ti tsanisilwe msana; ngu toneto mabhongwe nene; ni mfumeli wule ti si kotekiko ku mueyisa.

³²Ngako u di tsimbite ngu wuphukuphuku, u ti guleta, ni kungako u di pimisete to biha, veka dianza ha ka txisofu.

³³Nguko ku txi sengwa masi ka maneka dithoma, se ku txi kamwa thonvu, kuhuma mnoha, se ku txi wuswa kuhenya kuhumisa dizunga.