Read chopi Mavingu 4 Bible Online

Mavingu 4 - chopi bible

Mavingu 4

¹Engisani vanangu, silayelo sa tate wanu, kasi mi na mana kupfisisa wutxhari.

²Nguko na mi ninga gondo ya yinene; mi nga lekeni mlayo wangu.

³Nguko ani ni ti ti mwanana wa tate wangu, tximwananana tximwetxo txo randeka, ka mwamwangu.

⁴Se tate a ti ti ni gondisa a txi khene: Mbilu yako yi na vekise mapswi angu; veketa sirumo sangu u na hanya.

⁵Mana wutxhari, mana mapimo, u nga divale hambi kuhambana ni mapswi a txisofu txangu.

⁶U nga hambane ni wutxhari, nguko wona wu na kuxayisa; wu dhunde, wona wu na kuxayisa.

⁷Wutxhari ngu txona tximaha txo khata; wu mane koko, wutxhari; ina, mana wuzivi ngu sotshe si u ku naso.

⁸Guleta wutxhari, ni wona wu na kuguleta; se ngako awe u txi khutarela wutxhari, wona wu na kudhumisa.

⁹Wu na veka m'bhoti wa wumbilu ha msungo kwako, kambe wu na kuninga m'bhoti wa wudhundo.

¹⁰Mwanangu, engisa, tumela mapswi angu, se u na engetelwa malembe a kuhanya kwako.

¹¹Ni ku gondisile nzila ya wutxhari, kambe ni ku tsimbitisile ngu tinzila to lulama.

¹²U txi tsimbila ngu tona, kha ma na mbi karala mazambo ako; hambi u txi tutuma, khu na mbi humbwa.

¹³Tsana ka sileleto, kambe u nga si leke; si xayise nguko sona mbutomi wako.

¹⁴U nga wulele ka nzila ya vaonhi, hambi kutsimbila ngu nzila ya vo biha.

¹⁵Yi leke nzileyo, u nga tsimbile ngu yona; yi vayilele, u pinda ngu kule.

¹⁶Kha va oteli va si se maha to biha, se wukohe wa va tutuma, ngako va si se wisa m'thu.

¹⁷Nguko vadya dipawu da wuonhi, se ve sela vhinya ya mazunga.

¹⁸Aniko nzila ya vo lulama yi fana ni kuwoninga ka wuronga, ku woningako kambe ni kambe diza di hetiseka kutxa.

¹⁹Nzila ya vaonhi yi fana ni txidema; kha va txi zivi atxile va humbwako ngu txona.

²⁰Mwanangu, pfisisa mapswi angu; ka ditshuri dangu namisa nzeve yako.

²¹U nga ma leke me khukha masoni kwako; ma vekete hagari ka mbilu yako.

²²Nguko ona mbutomi ka vale va ma manako, ni kuhanya ka mimidi yawe.

²³Txitimwi ka sotshe si si dinganako kuxayiswa, xayisa mbilu yako, nguko tita ngu ka yona tinzila ta wutomi.

²⁴Vayilelisa txisofu txako ka mapswi o xanisa, u tsulisa kule ni nawe wubihi wa txisofuni.

²⁵Maso ako ma na wone ngu kululama, timboni tako ti na wonetele masoni kwako kupune.

²⁶Xayisisa nzila ya mikondo yako, ni totshe tinzila tako ti na mahe to longoloka kha kwati!

²⁷U nga wekelele hambi txinene, mwendo txibhabha; thavisa mkondo wako kubihani.