Read chopi Mavingu 5 Bible Online

Mavingu 5 - chopi bible

Mavingu 5

¹Mwanangu, pfisisa wutxhari wangu; dingeta nzeve yako ka ditshuri dangu;

²kasi ku u na xayisa siziviso sangu, ni txisofu txako txi vekete wuzivi.

³Nguko txisofu txa wamsikati wa dibhemba txi humisa sihesa sa wulombe, mkanani kwakwe ku rawula kupinda mafura;

⁴aniko magwito a kona ngu bava ko pinda txibhaha, ni kuhinda ko fana ni ka ditxhari do lotwa madhawa mambidi.

⁵Mikondo yakwe yi relela kufani; mikondo yakwe yi tserama mndiloni.

⁶Ene kha nga ni mhaka ni ditshuri da wutomi; tinzila takwe ndingi, kambe kha ti zivi.

⁷Konkuwa koko vanangu, ni pfisiseni, mi nga vayileleni mapswi a txisofu txangu.

⁸Vayilelisa nzila yako kwakwe, kambe u nga tshukete ha txikeni ka nyumba yakwe;

⁹kasi ku u si ningeli wudhundo wako ka vamwani, hambi malembe ako ka sidayi.

¹⁰Kasi kuthomba yako yi si dyiwi ngu va walo, ni yotshe mithumo yako yi vhuna vamwani;

¹¹se ngu magwito kwako u keta, mbimo yile yi gumako nyama yako ni mmidi wako,

¹²se u txi khawe: Ni nyenyile walo kulaywa! Ni mbilu yangu yi lambile kukawukwa!

¹³Kambe kha na pfisisa dipswi da vagondisi, hambi ku riya nzeve yangu ka valayeli vangu!

¹⁴Ni lavile kuwela kubihani masoni ka msengeletano ni ka mtalo wa vathu.

¹⁵Sela mati a txisima txako, ni a minambo ya txisima txako.

¹⁶Ma ndi na thekelela hahanze mati a sisima sako, ni tinzilani sinambwana sako sa mati kani?

¹⁷Ma nave ako dwe, hi nga o siyetisana ni vamwani vathu.

¹⁸Txiziva txako txa mati txi na kateke, tsakiswa ngu msikati wa wuphya wako,

¹⁹kufana ni mhoti yo randeka, ni mhoti yo tsakisa; titshumbu takwe ti na ku tsakise yotshe mbimo; ndindwa ngu lirando lakwe ngu ha ku si gwitiko.

²⁰Se mwanangu, u ndi na navetiswa kutxani ngu dibhemba, se u khutarela titshumbu ta wa matiko kani?

²¹Nguko tinzila ta m'thu ti wonwa ngu maso a MKOMA, kambe ene wa xaxameta totshe tinzila ta m'thu.

²²Kasi muonhi, wubihi wakwe wu na msungelela, kambe ngu tingoti ta sionho sakwe, a na ñolwa.

²³Ene a na fa nguko kha londeta silayelo, kambe a na mwalatwa ngu kutala ka tinzila takwe ta walo.