Read chopi Mavingu 7 Bible Online

Mavingu 7 - chopi bible

Mavingu 7

¹Mwanangu, xayisa mapswi angu, u sisa mndani kwako sirumo sangu.

²Xayisa sirumo sangu u na hanya; ni mlayo wangu, kufana ni ndololwani ya diso dako.

³Si sungelele mu ka titiho tako, u si bhala ka mbila ya mbiluni kwako.

⁴Womba ka wutxhari ku khawe: Awe u ndiyangu; ni ka kupfisisa, i nda khawe dixaka;

⁵kasiku si kuvhikela ka wamsikati wa vane, ka wule wa wubihi, wo tshambisela ngu mapswi akwe.

⁶Nguko ani ni solelete ngu ha ka difasitela da nyumbani kwangu,

⁷ni rumarumete hagari ka siphukuphuku, ni tumbute hagari ka vavaphya, dijaha dimwedo do kelelelwa ngu mapimo,

⁸di nga ti pinda ngu nzila, hafuhi ni dikhonani ka dona, di txi tsimbila ngu nzila yoya m'tini ka dona,

⁹ku txi phumelaa, kuswani ka ditambo, amu ka txidema txa wusiku.

¹⁰Wona taku, ku to huma wamsikati e muhingeta, a di ti tshurisete ngu nzila ya wugelegele, ni mbilu ya wukanganyisi.

¹¹I ti wamsikati wa diguwa ni kanu, mikondo yakwe yi ti si emi hamtini;

¹²nze a tinzilani, nze a mithandani, e solelela ka otshe makhona,

¹³a to tshuketa kwakwe, se e mpswopswa, kambe a to gwatamisa khohe yakwe, a txi khene:

¹⁴Ni nayo miphaxo ya kuthutha; nyamsi ni dihisile kuvilela kwangu.

¹⁵Ngu konaho, ni humile ni kuhingeta, ku ta wonisisa khohe yako, se ni ku mani.

¹⁶Se ni fenengetile m'bhedhu wangu ngu simaha so tshura, ngu so mahwa ngu masilika o hehuka a Egipta;

¹⁷ni tshatshete ditaho dangu ngu mira, mafura ni kinamomo.

¹⁸Ngono hi ta ti khurisa ngu lirando kala ditxa; a hi tsakisane ngu lirando.

¹⁹Nguko mwamna wangu kha nga ho m'tini, a endete kuya kule.

²⁰Manzani kwakwe a ni txikwamana txa male; a na wuya m'tini ngu ditshiku di a ngadi womba.

²¹A mndindile ngu kutala ka mapswi akwe, ngu kutshambisela ka txisofu txakwe a mkurumetile.

²²Se ene e mlondisa koneko, nga homu ya kuya kudawani; nga txiphukuphuku txi txayiswako mkorani;

²³eza e fulwa txivindi ngu lingove, kufana ni txinyana txi tutumelako mlawuni, na txi si ti zivi taku wu riyela wutomi wa txona.

²⁴Konkuwa koko, anu vanangu, niheni tinzeve, kambe mi pfisisa mapswi a txisofu txangu;

²⁵mbilu yako yi nga wekelele ka tinzila takwe, kambe u nga mwalatwe ngu tisoko takwe;

²⁶nguko a dayisile votala e va wisa; kambe mbangi ngutu vale va nga dawa ngu ngene.

²⁷Mtini kwakwe ku ni tinzila to yisa dithithani, ti yisako tinyumbani ka lifo.