Read chopi Ekleziyaste 10 Bible Online

Ekleziyaste 10 - chopi bible

Ekleziyaste 10

¹Nga kule phuka yofa yi pfalisako kununga ko txhipisa mafura o bhumula,[2] ngu toneto, wuphukuphuku wa onha wutxhari ni wudhumo wa m'thu wa nduma.

²Mbilu ya txhari yi txineneni ka yona, aniko mbilu ya txiphukuphuku yi txibhabha ka txona.

³Se kala yihi mbimo txiphukuphuku txi tekako nzila ya txona, txi txi pwata mapimo, txi txi womba ka votshe taku njiphukuphuku.

⁴Ngako mfumeli atxi ku henyela, u nga leke wukhalo wako, nguko txitumelelano mrende wo malata sionho sa hombe.

⁵Kambe ku ngadi ni wubihi wu ni nga wu wona hahatshi ka ditambo, wo fana ni txihoheto to mahwako ngu mfumeli:

⁶Txiphukuphuku va txi khalahatshisa ka makhalo o guleka ngutu, aniko vanyatithombe va khalahatshile ka wukhalo wa hahatshi.

⁷Ni woni tikhumbi ti di gadhile mahantxhi, ni vathangeli va nga ti ti tsimbila ngu mikondo, kufana ni tikhumbi ha mafuni.

⁸Awule a kelako diphala a na wela ka dona, ni wu a dhodako diseta a na lumwa ngu mnyoka.

⁹Awule a rwalelako marigwi a na dawiswa ngu ona, ni wule a bhandako tikhuni a tivangela dikhombo.

¹⁰Ngako nzanga yako yi di pinyekile, u txi divala ku yi lota, m'thu a fanela kuengetela mtamo; aniko wutxhari wu vhuna m'thu kuhumelela.

¹¹Ngako mnyoka wu txi kuluma na wu sanzi kuthumiswa ngu tiñanga, kha ku na mrende wu ñanga yi nga ku vhunako ngu wona.

¹²Mapswi a txisofu txa txhari ma tsakisa, aniko txisofu txa txiphukuphuku txa txi haxula.

¹³Makhato a timhaka ta txisofu txa txona mbuphukuphku, ni magwito a kuwombawomba ka txona wupumbu wa hombe.

¹⁴Txiphukuphuku txi andisa mapswi, aniko m'thu kha ti zivi ti ti no humelela; se i mani a no m'zivisa ti ti no humelela msana kwawe kani?

¹⁵Mthumo wa siphukuphuku wa si rera sotshe, nguko kha si yi zivi nzila yoya didhoropani.

¹⁶Dikhombo kwako awe ditiko, mfumeli wako i ku mwanana, vathangeli va dona vadyako ni mixo.

¹⁷U katekile awe ditiko di mfumeli wa dona i ku mwanana wa vahombe, vathangeli va kona vadyako ngu mbimo ya kona, kasi kuwuteta mitamo, na i si nga kutilevisa.

¹⁸Ngu mhaka ya wukara wa hombe,[3] ni lyangwa la tuta, nyumba yo tshulelwa ngu mkara ya tuta.

¹⁹Vathu va rambana kasi ku ta tsaka, ni vhinya yi tsakisa kuhanya, kambe sotshe si manwa ngu male.

²⁰U nga ruketele mfumeli, hambi ngu mapimo ako, nikakudotho u nga ruketele nyatithombe, hambi u di nyumbani kwako; nguko sinyana sa nzumani si nga rwala mhaka ya kona, se sile si ku ni tibhapi si nga ya hangalasa mhaka.